Дьокуускайга "Сиэгэн суола" диэн байыаннай-патриотическай хайысхалаах смена саҕаланна

Оһолломмут киһиэхэ бастакы суһал көмөнү оҥоруу. Ууга түспүт киһини быыһыыр араас ньымалар. Байыаннай сааны-саадаҕы билии. Маны барытын оҕолорго туһааннаах исписэлиистэр көрдөрөн сиһилии кэпсииллэр. Олоххо-дьаһахха, чуолаан айылҕаҕа араас түбэлтэ буоларыгар куруук бэлэмнээх буолуу бу симиэнэ сүрүн хайысхата буолла. Онон манна эт-хаан өттүнэн үрдүк бэлэмнээх, тулуурдаах буолар ирдэнэр. Кирилл Потапов номнуо уопуттаах онон тургутууну чэпчэкитик ааһар эрэллээх.

Кирилл Потапов, "Путь росомахи" байыаннай-патриотическай лааҕыр иитиллээччитэ: «Былырыын сылдьыбытым. Эмиэ маннык этэ. Ыарахан, эт-хаан өттүнэн бэлэм буолуохха наада. Бу смена кэннэ миссияҕа көтөбүн».

Бу бастакы күн тургутууга бэлэмнэнии буолар. Бу күн сменаны үөрүүлээх быһыыга-майгыга арыйдылар. Хас биирдии хамаанда аатын-суолун, девиһын билиһиннэрдэ. Уонна эйэлээхтик итиэннэ чиэһинэйдик күрэхтэһэр туһунан андаҕар тылларын биэрдилэр. Оҕолору смена арыллыытынан ис дьыала итиэннэ ыксаллаах быһыы-майгы министиэристибэтин үлэһиттэрэ, Росгвардия байыастара, быыһааччылар эҕэрдэлээтилэр. Ол кэннэ хас биирдии исписэлиис бэйэ хайысхатынан маастар-кылаас көрдөрдүлэр.

Николай Макаров, СӨ быыһыыр сулууспатын быыһааччыта: «Сегодня мы покажем основы оказания первой помощи. Это у нас тренажёр оказания сердечно-лёгочной реанимации. Ребята попробуют оказать помощь, оживить пострадавшего. Также есть носилки, правила транспортировки пострадавших с различными травмами».

Оҕолор хас биирдии маастар-кылааһы сүрдээҕин сэҥээрэн иһиттилэр. Маныаха хас биирдиилэрэ теория кэннэ практическай сорудаҕы эмиэ оҥорон көрдүлэр. Манна үгүстэрэ номнуо хаһыс да сылын байыаннай-патриотическай лааҕырга дьарыктаммыт оҕолор буолаллар. Онон үөрүйэхтэр.

Егор Охлопков, Дьокуускай куорат үөрэх салалтатын салайааччытын солбуйааччыта: «Бу оҕолор кыһыннары оскуолаларыгар дьарыктаммыттара. Ону таһынан куоракка Юнармияҕа дьарыктаммыттара. Сайыҥҥы өттүгэр бу лааҕырга кэллилэр».

"Путь росомахи" диэн байыаннай патриотическай лааҕыр быйыл иккис сылын үлэлиир. 100 тахса оҕо номнуо араас тургутууну ааһан, олоххо буолар араас түбэлтэҕэ бэлэм буоларга үөрүйэхтэрин үрдэттилэр. Бастаан 5 күн бэлэмнэнии буолар, онтон дьэ ойуурга баран бу сатабылларын көрдөрүөхтэрэ.