Өймөкөөн улууһугар чөлүгэр түһэрии үлэлэрэ салҕаналлар

Өймөкөөн улууһун нэһилиэктэригэр халаантан эмсэҕэлээбит дьиэлэри көрүү-истии түмүктэнэн аахталары оҥорон бэлэмнээтилэр. Туох-хайдах, төһө эмсэҕэлээбитин барытын докумуоҥҥа тиһэн бигэргэтэллэр. Бүгүҥҥү күҥҥэ аахталары Дьокуускайга номнуо ыыттылар, бу түмүгүнэн көмө харчы көрүллүүтэ чопчу быһаарыллар.

Алексей Федотов, Өймөкөөн улууһун баһылыгын бастакы солбуйааччы: «Тыа хаһаайыстыбатын өттүттэн эмиэ уопсайа 50 эбийиэк бардылар уонна оттуур ходуһалар, кыһалҕа буолан турар оттооһуҥҥа тахсыы. Сүрүн хамсааһын саҥа саҕаланан эрэр».

Бүгүҥҥү күҥҥэ Өймөкөөн, Абый улуустарын олохтоохторуттан уопсайа 2083 сайабылыанньа киирдэ. Олортон 1511 материальнай көмөҕө, үбүнэн көмөҕө 571 сайабылыанньа киирдэ. Билигин олохтоохтор дьиэлэрин акылааттарын, муосталарын уларытыыга, куурдуу түбүгэр сылдьаллар. 235 олорор дьиэ ууттан эмсэҕэлээбититтэн, 122 дьиэ уонна кыбартыыра хапытаальнай өрөмүөҥҥэ наадыйар. Онтон 5 дьиэҕэ киһи кыайан олорор кыаҕа суох.

Виктор Романов, СӨ тутуу миниистирэ: «18 сырыы пиломатериал барара былааннанар. Билиҥҥи туругунан 2 сырыы тиийэн, биир массыына айаннаан иһэр, сотору кэмҥэ тиийиэ уонна өрөмүөн үлэтэ саҕаланыахтаах».

Улууска уопсайа 9 улуустан тутааччылар биригээдэлэрэ кэлэн күүс-көмө буолаллар. Инфраструктараны чөлүгэр түһэрии ыытыллар. Ол курдук  нэһилиэктэр икки ардыларынааҕы суоллары массыына тиийэр эрэ гына оҥоруу барда, салгыы улахан чөлүгэр түһэрии өрөмүөн үлэтэ барыахтаах. Маны тэҥэ кыстыкка киириигэ хочуолунайдары, ититии ситимин өрөмүөннээһини атырдьах ыйын ортотугар диэри түмүктэниэхтэрин наада.

Дмитрий Садовников, СӨ бырабыытылыстыбатын бэрэссэдээтэлин бастакы солбуйааччы : «Ыйыллыбытын курдук икки оройуоҥҥа отопительнай сезон эрдэ саҕаланыахтаах. Билигин суһаллык биригээдэлэр үлэлэрин саҕалаатылар».

Дьокуускайга халаантан эмсэҕэлээбит улуустарга нэһилиэнньэттэн гуманитарнай көмөнү хомуйуу салҕанар. Көмөнү 26 нүөмэрдээх оскуолаҕа туталлар.

Надежда Фёдорова, халаантан эмсэҕэлээбит улуустарга гуманитарнай көмөнү хомуйар киин салайааччыта: «2,5 туонна курдук груз барда. Билигин 2-тэн тахса туонна груз бэлэмнэнэ сытар».

Сайыҥҥы халаантан улаханнык эмсэҕэлээбит Өймөкөөн улууһугар сүрүннээн кырааска, изовер, линолеум, саморез курдук тутуу, өрөмүөн матырыйааллара наадалар.