Өрөспүүбүлүкэҕэ ойуур баһаардарын утары үлэ салҕанар

Дьааҥы улууһугар үгүс ойуур баһаара бу кураанах этиҥтэн таҕыста. Маныаха уот ыраах тайаан сытар, киһи тиэхиникэнэн сатаан тиийбэт сирдэригэр турда. Аны туран чугаһынан уу суох буолан баһаары умулларыыга эмиэ уустуктары үөскэтэр. Ол да буоллар, бары ойуур баһаара хонтуруолга турар, умуруоруу үлэтэ тиһигин быспакка барар. Барыта 180 тахса киһи үлэлии сылдьар.

Владислав Иванов, Дьааҥы улууһун баһылыга: «Баһаардар нэһилиэктэртэн тэйиччилэр. Нэһилиэнньэҕэ уонна экономика эбийиэктэригэр куттал суох. Баһаардарга дьон үлэлии сылдьар».

Даҕатан эттэххэ, Дьааҥы улууһугар икки нэдиэлэ өҥүрүк куйаас күннэр турдулар. Ол курдук, 32 кыраадыска тиийэ итийэ сылдьыбыт. Мантан сылтаан хас да уот күөдьүйбүт. Ол эрэн, күнү-дьылы кэтээн көрөр сулууспа сабаҕалааһынынан бу күннэргэ хотугулуу-арҕаа эҥэр былыттаах сөрүүн күннэр туруохтара.

Николай Никитин, СӨ ойуур хаһаайыстыбатын департаменын салайааччы: «Росгидромет этэринэн, хоту улуустарга ресурснай былыт тахсыах курдук. Онно баҕар ФБУ Авиалесохрана зондировщика кэлиэхтээх. Билигин Верхоянскай улууска федеральнай күүстэри кэтэһэбит».

Күн бүгүн ордук элбэх ойуур баһаара хоту эҥэр бэлиэтэнэр. Оттон Дьааҥы уонна Томпо улуустарыгар ыксаллаах быһыы-майгы балаһыанньата биллэриллэн турар. Бары ойуур баһаардара бырабыытылыстыба хонтуруолугар тураллар. Туһааннаах биэдимистибэлэр, олохтоох дьаһалталар сиринэн, үөһэнэн кэтээн көрүү үлэтин күннэтэ ыыта олороллор.