Атырдьах ыйын 1 күнүттэн Саха сиригэр күһүҥҥү булт кэмэ арыллар

Дьокуускай куорат олохтооҕугар Ян Федоровка бугун ураты күн. Кини саамай бастакы саатын атыылаһан,  Росгвардия Саха сиринээҕи управлениятын лицензияны, көҥүлү биэрэр киинигэр кэллэ. Бүгүн кини булка-алка сылдьар "эрэллээх доҕорун" тустаах биэдэмистибэҕэ учуокка туруорда.

Ян Фёдоров, Дьокуускай куорат олохтооҕо: «РОХАҕа учуокка турдум, икки нэдиэлэнэн номнуо бэлэм буолара буолуо, күһүҥҥү сезоҥҥа кустуу тахсаары. Турецкай икки уостаах саа. Сокуонунан 2 сыл икки уостааҕынан сылдьаҕын, ол кэннэ биэстэ иитиллэр көҥүллэнэр».

Ян Федоров курдук куһуҥҥү булка бэлэмнэнээччиллэр лицензия, көҥүл биэрэр кииҥҥэ үгүстэр. Оттон быйыл бу эйгэҕэ үгүс уларыйыылар киирдилэр. Чуолаан төлөбүргэ.

Тимир Олесов, Росгвардия Саха сиринээҕи салалтатын лицензияны, көҥүлү биэрэр киинин саа эргиирин хонтуруоллуур Дьокуускай куорат уонна Жатай уокуруктарын салаатын судаарыстыбаннай иниспиэктэрэ: «Тохсунньу ыйтан пошлина улаатта. Көҥүллээһиҥҥэ, лецензия уонна аадырыскын уларыттахха хаттаан оҥотторууга».

Үгүс кэккэ уларыйыылар киирэннэр, саа ыларга лицензия биэрии бэрэбиэркэтэ күүһүрдэ. Ону кытары тэҥҥэ риэйдэбэй тэрээһиннэр. Аҥардас сыл саҕаланыаҕыттан өрөспүүбүлүкэ үрдүнэн 13384  саа хаһаайыттарын  бэрэбиэркэлээтилэр, ол түмүгүнэн 1333 административный боротокуол толоруллубут. 2878 саа уонна 5210 ботуруон былдьаммыт. Маны кытары сааны нэһилиэнньэттэн тутуу  үлэтэ  тохтообот.

Иван Протопопов, Росгвардия Саха сиринээҕи салалтатын лицензияны, көҥүлү биэрэр киинин саа эргиирин хонтуруоллуур Дьокуускай куорат уонна Жатай уокуруктарын салаатын салайааччыта, полиция майора: «Анал байыаннай дьайыыга саа тутуута бара турар. Муус устар ыйга байыаннай чаастар аахсыйа тэрийбиттэрэ, онно сүүстэн тахса сааны туттарбыттара. Саа хаһаайыттарыгар этиэм этэ: атырдьах ыйыгар эмиэ аахсыйа тэриллээри сылдьар, саалаахтар кэлэн туттарыаххытын син».

Манна даҕатан этэр эбит буоллахха, туттарыыга сүрүн ирдэбил - 5 эстэр автомат саа, 12 калибрдаах буолуохтаах.  Нэһилиэнньэттэн анал байыаннай дьайыыга сааны-саадаҕы туттарыы барыта бу кииҥҥэ ааһар.