Сайыҥҥы халаан уутуттан эмсэҕэлээбит Өймөкөөн улууһун чөлүгэр түһэрии үлэтэ барар

Уус Ньара олохтооҕо, сэрии оҕото Роман Давлетов дьиэтигэр айылҕа алдьархайа хаалларбыт содулун ыйан көрдөрөр. Билигин аҕам саастаах дьиэтин куурда, ыраастыы сылдьаллар. Ытык кырдьаҕас соҕотох олорор, ол эрэн киниэхэ дьиэтин-уотун, оҕуруотун көрөргө биир дойдулааҕа Татьяна Аммосова илии-атах буолар. Кини уу көрүөх бэтэрээ өттүгэр дьиэни бүтүннүү ылбыта диэн кэпсиир.

Татьяна Аммосова, Уус Ньара бөһүөлэгин олохтооҕо: «Сарсыарда алта чааска оҕуруот көрө сырыттахпына уу киирэн эрэр этэ, онтон хоско киирэн тахсыам икки ардыгар уу номнуо муостанан киирэн түргэн баҕайытык туолан хаалбыта».

Өймөкөөн улууһугар халаантан уопсайа 129 олорор дьиэ эмсэҕэлээбит, мантан 5 дьиэ олорорго табыгаһа суох гына алдьаммыт. Билигин хоромньуну ааҕыы күүскэ бара турар, эмсэҕэлээбиттэртэн сайабылыанньалары тута олороллор. Оттон олохтоохтор волонтердар, быыһааччылар көмөлөрүнэн дьиэлэрин куурдаллар, чөлүгэр түһэрии үлэтэ ыытыллар.

Оттон олорор дьиэлэри таһынан инфраструктура суолталаах эбийиэктэрэ эмсэҕэлээтилэр. Биир сүрүн эбийиэктэр суол учаастактара. Манна билигин өрөмүөн үлэтэ күүскэ барар. Бу Нерскэй дьоҕус түөлбэттэн бөһүөлэккэ киирэр суолу оҥоро сылдьаллар. Даҕатан эттэххэ, халаантан Өймөкөөн улууһугар уопсайа 72 суол учаастага алдьаммыта. Онон билигин уочаратынан бары учаастактарга тэтимнээх үлэ барар.

Николай Прокопьев, Уус Ньара бөһүөлэгин баһылыгын солбуйааччыта: «Биһиэхэ утары бараннар суолбутун оҥоро сылдьабыт. Карьертан сирбитин, тааспытын таһа сылдьабыт».

Айылҕа алдьархайыттан тыа хаһаайыстыбатын салаата эмиэ күүскэ эмсэҕэлээтэ. Оттуур ходуһалары бүтүннүү уу ылан, билигин хаһаайыстыбалаахтар сатаан окко киирбэккэ олороллор. Онон кыстыкка хайдах үктэнэр туһунан кэпсэтии барар. Аны маны таһынан сүөһү турар хотонноро эмсэҕэлээтилэр. Билигин миэстэтигэр туһааннаах министиэристибэ исписэлиитэрэ хаһаайыстыбалары кэрийэ сылдьан тахсыбыт хоромньуну ааҕаллар.

Анатолий Алексеев, СӨ экология миниистирин солбуйааччыта: «Дьон ходуһата ууга сытар. Кыстыкка киирэр хороҕор муостаах аһылыгын боппуруоһа турар».

Онон билигин хоту дойду дьоно этэҥҥэ кыстыкка үктэнэллэригэр бары күүс ууруллар. Бырабыытылыстыба итиэннэ өрөспүүбүлүкэ олохтоохторуттан араас көмө киирэ турар. Үлэ күн аайы өрөбүлэ суох барар.