Дьокуускайга сибиэһэй оҕуруот аһын атыытын үгэнэ

Билигин оҕуруот аһа, фрукта эгэлгэтэ дэлэйэн күөх, кыһыл, күөх битэмииннээх ас хотойорунан тэлгэммит. Олохтоох оҕуруоччуттар үүнүүлэрэ быйыл орто диэн сыаналыыллар. Дьокуускай олохтооҕо Александр Данилов ырыынактан оҕуруот аһын атыылаһа кэлэр. Кыралаан амсайыыга ылабын, сибиэһэй бэйэ оҕурсута, помидора, хаппыыстата элбээбит диэн кэпсиир. 

Александр Данилов, Дьокуускай олохтооҕо: «Оҕурсу, помидор, арбуз, хортуоппуй. Билигин элбээбит уонна сыаната түспүт. Онон үчүгэй».

Олохтоох оҕуруот аһа сүрүннээн Тулагы-Киллэмтэн, Жатайтан, Мархаттан, Хатастан кэлэ турар. Дьон сылдьыыта көхтөөх. Ким фрукта, ким оҕуруот аһын амсайыыга ылар. Кэлии клубника, черешня, сугун, малина ырыынакка дэлэй, оттон олохтоох сир аһа тас өттүгэр атыыга тахса илик, арай иһирдьэ өттүгэр барыанньанан биирдиилээн атыылыыллар. Холобур Узбекистан черешнятын 500-800 диэри сыанаҕа атыылаһыахха сөп.

Атыыһыттар этэллэринэн дьон сүрүннээн күннэтэ оҕурусуну, помидору, хаппыыстаны көхтөөхтүк атыылаһар. Онон бу көрүҥнэргэ сыана кыралаан туүспүт, холобура оҕурсуну киилэтин 90 солкуобайтан саҕалаан атыылаһыахха сөп.

Айпед Хенат, ырыынак атыыһыта: «Сейчас начинают дешеветь местные тулагинские огурцы».

Бэйэ оҕурсута, помидора, хаппыыстата, кабачога, редиската, биэрэһэ элбэх, бэл сибиэһэй хортуоппуй кытта номнуо атыыга тахсыбыт. Холобура, кэлии хортуоппуй киилэтэ 100 эбит буоллаҕына, сибиэһэй олохтоох хортуоппуй 300-400 диэри сыанаҕа,  хаппыыста 150 солкуобайга тураллар, Казахстантан кэлбит моркуоп 180 солкуобай. Этиллибитин курдук, олохтоох оҕурсу дэлэйэн сыана кэм түспүт, помидор 350 солкуобайга турар.

Каролина Харлампьева, Бүлүү улууһун олохтооҕо: «Маннааҕы бэйэ олордуутун оҕуруотун аһа баар диэн үөрэбит. Оҕурсу, помидор, луук игин олордоллор эбит. Бэртээхэй, ылан сиэххэ сөп. Хаппыыстаны даҕаны, кыра да буоллар».

Ырыынакка атыы-тутуу үгэнэ. Мантан күһүн олохтоох бэйэ бородууксуйата өссө эбиллиэ турдаҕа.