Дьокуускай суолларыгар икки күн иһигэр 346 административнай боротокуол толорулунна

Полиция лейтенана Дуолан Яковлев бииргэ үлэлиир иниспиэктэрин кытары  дьуһуурустубаларыгар   таҕыстылар. Киин куораты атын уулуустары ситимниир Кыайыы болуоссатын биир улахан суол быһа охсуһуутугар кинилэр бүгүн үлэлииллэр. Суол бэрээдэгин көрүүгэ тимир көлөлөр тохтотулаллар.

Дуолан Яковлев, суолга куттал суох буолуутун хааччыйар иниспиэксийэ судаарыстыбаннай иниспиэктэрэ, полиция лейтенана: «Симиэнэҕэ таҕыстыбыт. Сүрүн кэһиилэр – двойной сплошнойу кэһээһин, кыһыл уокка тохтооботтор уонна суол утары өттүгэр тахсаһын».

Чахчы уопуттаах үлэһит бэлиэтииринэн үгүс элбэх суол саахала бу быраабылалары кэһииттэн тахсаллар. Холобура, бу ааспыт өрөбүллэргэ аҥардас киин куоракка 13 суол быһыылаана тахсан, онно биир киһи эчэйии ылла. Маныаха  субуота күн Мархаҕа улахан саахал тахсан суоппардарга үгүс күчүмэҕэйдэри үөскэттэ.

Жанна Макарова, Дьокуускайдааҕы суолга куттал суох буолуутун хааччыйар сулууспа сырдатар үлэҕэ инспиэктэр: «От ыйын 26 күнүгэр 64 саастаах “Тойота Королла” тимир көлө суоппара суол быһа охсуһуутугар кэлэн баран утары иһэр хайысхаттан “Тойота Марк2” көлөнү ыыппакка суол саахалын таһаарбыт. Ол түмүгэр бэйэтэ араас эчэйиилэри ылбыт. Уонна икки өрөбүл күннэр иһигэр 16 аһыы утах иһиилээх суоппар тутуллубут, олортон 5 суол саахалларын таһаарааччылара буолаллар».

Төһө да араас сэрэтэр - профилактическай тэрээһин ыытыллыннар аһыы утах иһэн баран уруулга олоруу түбэлтэлэрэ намыраабаттар. Эбиитин арыгы иһэн баран суол саахалын таһаараллар. Бу өрөбүллэргэ 31 массыынаны ыстырааптыыр стоянкаҕа туруордулар.

Оттон статистика хобдох сыыппырата көрдөрөрүнэн сыл саҕаланыаҕыттан киин куоракка 1822 суол саахала тахсыбыт, былырыын баччаларга 1948 бэлиэтэммит. Итиэннэ дьон өлүүтун  көрдөрүүтэ намтаабыт. Быйыл 9 ааспыт сыл 13 киһи сырдык тыына быстыбыт. Маныаха быйыл эчэйиилэри көрдөрүүтэ үрдээбит. Чуолаан оҕолорго.

Өрөспүүбүлүкэ үрүдүнэн эмиэ суол саахала тахса турар. Улуустааҕы инспиэктэрдэр эмиэ бу өрөбүллэргэ күүһүрдүллүбүт эрэһииминэн үлэлээтилэр.

Ирина Ефремова, СӨ суолга куттал суох буолуутун хааччыйар иниспиэксийэ пропаганда салаатын судаарыстыбаннай иниспиэктэрэ: «Бу өрөбүллэргэ Саха сирин үрдүнэн уопсайа 17 суол саахала таҕыста. Ол курдук, биир киһи тыына быһынна Таатта улууһугар, 12 киһи араас эчэйиилэри ылла, ол олортон 2 оҕо буолар».

ГАИ инспиэктэрдэрэ суоппардарга суол быһа охсуһууларыгар болҕомтолоох буоларга ыҥырар, маныаха сөптөөх ускуораһы тутуһары тоһоҕолоон этэр.