Дьокуускайга Уһук Илиҥҥи федеральнай уокуруктааҕы дроннар күрэхтэһиилэрэ ыытылынна

41

Уота умайар, ыйааһына ирдэбилгэ эппиэттиир. Бастакы түһүмэх саамай эппиэтинэстээх. Манна кыттааччылар дроннары бэйэлэрэ хомуйан техническэй көрүүнү аһардыахтаахтар. Оччотугар дьэ салгыы дроннары көтүтэн күрэхтэһэллэр. Билигин бу 75 кылаастаах диэн саамай кыра кээмэйдээх көтөр аалы хомуйдулар. Хамаандалар бары ох курдук бэлэмнээхтэр.

Алексей Бехтюев, тренер, күрэх кыттыылааҕа: «Күрэхтэһиигэ бэйэм кыттабын, 4 оҕолордоохпун. Бастаккы күҥҥэ технигынан үлэлиибин сборнай хамаандаҕа. Ааспыт ыйга өрөспүүбүлүкэ первенствота уонна чемпионата буолбута. Онно күрэхтэспиппит уонна 2 нэдиэлэ устата бэлэмнэннибит».

Дрону хомуйуу сүрдээх умсугутуулаах, уһун-киэҥ. Манна кыттааччылар булгуччу күрэх быраабылатын тутуһан кырачаан тимир көтөрдөрү оҥоруохтаахтар. Онтон кыайбыт дрон киэбинэн бары хамаандалар көтөр аалларын хомуйан күрэхтэһэллэр. Маныаха кыайыылааҕы быһаарар эмиэ уустук диэн суудьуйалар бэлиэтииллэр.

Андрей Медведев, күрэхтэһии сүрүн суудьуйата: «Мы при помощи участников конкурса промышленного дизайна, который мы проводили, отобрали лучшие работы, и, соответственно, победил человек, который создал вот такой. Мы немножко доработали, чтобы она была более практичная, и дали определенное поле для доработок уже самим участникам».

Онтон салгыы дроннары салгыҥҥа көтүттүлэр. Кыттааччылар виртуальнай ачыкылаах, анал контроллер диэн пульт көмөтүнэн көтөр аалларын салайаллар. Бастаан бу 75 кылаастаах кыра дроннарынан күрэхтэһэллэр, онтон улахан кыамталаахтары көтүтүөхтэрэ. Күрэхтэһиигэ араас регионнартан кыттааччылар муһуннулар.

Андрей Андреев, СӨ дроннар күрэхтэрин федерациятын бэрэссэдээтэлэ, күрэхтэһии тэрийээччитэ: «Биһи күрэхтэһиибит Уһук Илиҥҥэ бастакытын ыытыллар. Манна 4 сүүмэрдэммит хамаанда кэлэн күрэхтэһиигэ кыттыыны ылар. Амурскай, Сахалинскай уобаластартан, Бурятия Өрөспүүбүлүкэтиттэн уонна биһиги хамаандабыт күрэхтэһэр. Кыайыылаахтар Арассыыйа чемпионатыгар кытта барар кыахтаналлар».

Бу нэдиэлэҕэ кыттаачылар аны онлайн күрэхтэһиини ааһыахтара. Онно кыайбыттар Арассыыйа чемпионатыгар Сочи куоракка путевканы ылыахтара.