Оҕуруот аһын үүнүүтүн үгэнэ

28 миэтирэ уһуннаах, 8 миэтирэ туоралаах тэплииссэҕэ билигин үүнүү үгэннээн турар. Оттон бу Нам улууһугар эрэ буолбакка бүтүн өрөспүүбүлүкэҕэ өлгөм үүнүүлээх оҕуруотун аһынан, эриэккэс сибэккилэринэн биллэр Евдокия Гаврильева -  Сибэкки Дуунньа хаһаайыстыбата буоллар.  Кини манна өссө олунньу ыйга производственнай оҕурсу суордун олордубута.

Евдокия Гаврильева, оҕуруоччут: «Үчүгэй баҕайытык аһын биэрэр. 300 ук оруобуна симэбит, 6 гэрээдэлээхпит, 24 миэтэрэлээх. Буорунан көмүллүбэт, сытыйан хаалыа диэн, үрдүгэр сытар суорт “Мева” диэн».

Уопуттаах оҕуруоччут бэлиэтииринэн быйыл чуолаан оҕурсуга күн -дьыл туруга соччото суох. Сорох дьон саҥа сиэн эрэллэр диэн санаатын үллэстэр. Ол да буоллар, кини ымпыктаах көрүүтүнэн күҥҥэ 20 киилэ оҕурсуну хомуйа олорор.

Иккис улахан тэплииссэҕэ эмиэ помидор өлгөмө үүнэ турар. Манна Евдокия эриэккэс, коллекционнай суортары олордор. Холобура, быйыл “Самерсан” диэн көрүҥү ыспыт. Манна уопсайа 80 ук элбэх аһы биэрэ турар.

Евдокия Гаврильева, оҕуруоччут: «Абрикос амтаннаах помидордары олордобун, оҕолорбор сиэтээрибин. Наар минньигэс амтаннаахтары олордобун, өрөспүүбүлүкэ оҕуруотчуттарын кытта үллэстэбин».

Уонна биллэн туран Евдокия Гаврильева аатырбыт винограда үүнэ-силигилии тураллар. Кини уопутун батыһан билигин Саха сиригэр үгүс киһи бу көрүҥ фруктаны үүннэрэр буолла диэн үөрэр. Уонна тэттик субэтин оҕуруоччуттарга тириэрдэр.

Евдокия Гаврильева, оҕуруоччут: «Тэплииссэтэ да суох киһи олордуон сөп. Сылаас тэплииссэ туттан эрэллэр, олорго сүбэлиэм этэ, хоруудаҕа буолбакка, сиргэ олордуохха наада».

Маны тэҥэ норуокка биллэр аатынан Сибэкки Дуунньа уһаайбатын иһэ араас дьэрэкээн, эриэккэс сибэккилэринэн сайыҥҥы күннэри киэргэтэ тураллар.