Дьокуускай куорат суолларыгар уопсайа 11 эбийиэги оннуттан көннөрүүгэ үлэ барар

Сэбиэскэй Армия 50 сыла бэрт эрэйдэммит уулусса күүтүүлээх өрөмүөнэ дьэ саҕаланна. Бу сааскыттан саҕалаан манна Сахатранснефтегаз тэрилтэ эргэ гаас турбаларын уларытыы үлэтин ыыппыта. Бу нэдиэлэттэн саҕалаан манна эргэ аспаалы көтүрүү үлэтэ барар. Кэрчиктэринэн көтүллүбүт сир оннун уларытан улахан тиэхиникэ буор, кумах кутан тэҥниир.

Сахайаан Михайлов, суол учаастагын маастара: «Экскаваторынан хастыбыт. 80-ча см уһуллубут, уонна полотнотун уларыта сылдьабыт».

Баараҕай өрөмүөн үлэтин бэдэрээччит РИК Автодор тэрилтэ ылсан үлэлэһэ сылдьар. Эбийиэк "Олоххо-дьаһахха аналлаах инфраструктура" диэн нацбырайыак чэрчитинэн үбүлэнэн Кальвицаттан саҕалаан Бабушкина аатынан уулуссаҕа диэри учаастага оннуттан оҥоһуллуоҕа. 

Александр Алексеев, өрөмүөннэнэр суол учаастагын салайааччы: «От ыйа ортотуттан сир үлэтин саҕалаатыбыт. Балаҕан ыйа бүтүөр дылы манна үс хос аспаал уурарбытын былаанныыбыт уонна тротуардары оҥоруохтаахпыт».

Бу суол хара тутуллуоҕуттан биирдэ даҕаны капитальнай өрөмүөн диэни билэ илик. Саҥардыллыннаҕына кэҥээн 4 балаһаланыаҕа. Сатыы сылдьааччыларга табыгастаах буоллун диэн тротуардаах, уоттаах-күөстээх буолара күүтүллэр. 

Хотугулуу-илиҥҥи федеральнай университет 3 кууруһун устудьуона Игорь Шарин суол өрөмүөнүгэр 3-с сезонун үлэлиир. Сарсыарда 8 чаастан киэһэ 7 чааска диэри  сүрүннээн  ыарахан илии үлэтигэр көмөлөһөөччү быһыытынан сылдьар.

Игорь Шарин, суол үлэһитэ: «Суолга мэһэйдээбэт курдук үлэлии сылдьабыт. Тугу этэллэринэн үлэлиибит».

Өрөмүөннэнэр учаастак уһуна 2 км 200 миэтэрэ, туората 20 миэтэрэ буолар. Сотору кэминэн манна канализация турбатын таҥыыга үлэ ыытыллыаҕа. Манна айан-сырыы хааччахтамматын туһуттан суолу бүтүүннүү саппакка үлэлэри түһүмэхтэринэн тэрийэллэр. Быйылгы сылга 800-кэ миэтэрэ суол төрдүттэн оҥоһуллан саҥа аспаалынан бүрүллүөҕэ.