Саха сиригэр от үгэнэ
Хатас олохтохторо Семен Петров уонна Андрей Осипов кыттыгас биир сиргэ оттууллар. Семен Борисович 10-ча төбө сүөһүлээх, ол иһигэр 3 ыанар ынахтаах, кыстыкка 6 сүөһүтэ киириэхтээх. Кинилэри төгүрүк сыл таһаарарга 15 туонна кэриҥэ оту оттуон наада.
Семён Петров, Хатас олохтооҕо: «Манна алааска, арыыга оттуубут. Алааспыт үүнүүтэ орто, бу ото быдан битэмииннээх арыытааҕар, ол иһин манна оттуу сатыыбыт».
Манна ходуһаттан 3 туонна кэриҥэ оту ылаллар, улахан аҥарын арыыга оттууллар. Ааспыт нэдиэлэттэн бу алаас сиригэр оттооһун көхтөөхтүк ыытыллар. Андрей Осипов дьонугар хас да ыал буолан көмөлөөн оттууллар. Ынах-сүөһүнү таһынан, үөр сылгылаахтар.
Андрей Осипов, Хатас олохтооҕо: «От үлэтэ син баран иһэр халлааммыт туран. Дьоннорум сүөһүлэрдээхтэр, бэйэм сылгылардаахпын. 20-30-ча туоннаны оттуубут».
Билигин хас биирдии нэһилиэккэ, улууска күнү-дьылы баттаһа оттооһун үгэнэ. Хатас үрдүнэн бу сайын уопсайа 2 тыһыынчаттан тахса туонна от оттуур сорук турар.
Евгений Пермяков, Хатас нэһилиэгин баһылыга: «Хатаска уопсайа 400-тэн тахса ынах-сүөһү баар, ону таһынан улахан тэрилтэ баар, кинилэргэ 700-тэн тахса төбө баар. Сыыспай сиэллээх 900-кэ баар уопсайа».
Улуустарынан от хаамыытын тыа хаһаайыстыбатын министиэристибэтигэр күннэтэ кэтииллэр. Өрөспүүбүлүкэ үрдүнэн бүгүҥҥү күҥҥэ уопсайа 13 тыһыынча туонна от оттонно, 20 тыһыынча га сир охсуллан турар. Ааспыт сыл баччаларын кытта тэҥнээтэххэ, кыра бытаарыы баар, ол курдук кэккэ улуустарга ардах, халаан уута мэһэйдээтэ. Быйыл от үүнээһинэ орто, мантан инньэ күн-дьыл турдаҕына, былаан барыллаан ааҕыынан 92 бырыһыан туолара сабаҕаланар.
Владислав Гаврильев, СӨ ТХМ үүнүүгэ уонна материальнай-тэхническэй хааччыллыыга департаменын салайааччы: «Билигин улуустар прогнозтарын Минсельхозка биэрбиттэрэ 400 тыһ. туоннаны оттуубут диэн. Ити 92% былааммытыттан, тиийбэт оту мобильнай биригээдэлэр тэйиччи сытар сирдэргэ тиийэн оттуохтаахтар, ол суоттааһына саҕаланыахтаах».
Быйыл кэккэ улууска ардахтан, халаантан уустук балаһыанньа үөскээтэ. Ордук хоту чуолаан Өймөкөөн, Абый улуустарыгар оттуур сирдэрэ ууга тураллар, онон былааннара туолбат чинчилээх. Маныаха бастаан хоромньуну ааҕаллар, онтон эмсэҕэлээбит улуустартан сайаапка түһэриллэн көмө үп-харчы көрүллүүтэ быһаарыллыахтаах.
