Дьокуускайга Арассыыйа Дьоруойа үрдүк ааты ылбыт Алексей Петрову чиэстээтилэр

Алексей Петров - Арассыыйа Дьоруойа. Саха сирэ номнуо 12 дьоруойданна. Алексейы үрдүкү наҕарааданы ылар бэлиэ күнүгэр кинини эҕэрдэлии элбэх киһи муһунна. Биир бастакынан эҕэрдэ туһаайытын Ил Дархан Айсен Николаев эттэ.

Айсен Николаев, СӨ Ил Дархан: «Хорсун хоодуот Арассыйа Дьоруойун Алексей Рафаэлович Петрову чиэстиир өрөгөйдөөх күммүт үүннэ. Бука барыгытын киэн туттан тураммын итиитик истинник эҕэрдэлиирбин көҥүллээн».

Кыһыл көмүс сулус мэтээли Илиҥҥи байыаннай уокурук сэбилэниилээх күүстэрин салайааччытын солбуйааччы генерал-майор Андрей Козлов туттарда. Дойду Президенэ Владимир Путин от ыйын 6 күнүнээҕи ыйааҕынан ефрейтор Алексей Петровка хорсун быһыытын, героизмын иһин Дойду Дьоруойа үрдүкү ааты иҥэрбитэ. От ыйын 21 күнүгэр наҕараада хаһаайынын булла.

Бэлиэ тэрээһиҥҥэ Алексей чугас дьоно-аймаҕа, биир дойдулаахтара - Үөһээ Бүлүү улууһун Маҕаас нэһилиэгин олохтохторо ыҥырыылаах ыалдьыт буоллулар. Алексей чугас дьоно биллэн турар олус долгуйабыт уонна киэн туттабыт диэн санааларын үллэстэллэр.

Аяна Максимова, Алексей Петров балта: «Биһи дьиэ кэргэҥҥэ үөрүүлээх. Сэрииттэн кэлэрин долгуйа кэтэһэн. Ону истэн үөрбүппүт».

Медведь диэн позывнойдаах Алексей Петров анал байыаннай дьайыыга өстөөх позицияларыгар саба түһэн, хас да пулеметнай туочуканы, уонунан боевигы уонна тиэхиникэни тус бэйэтинэн соҕотох суох оҥорбута. Хас да күннээх кытаанах кыргыһыылар кэмнэригэр ыараханнык бааһыран, икки атаҕын сүтэрбитэ, ол эрэн инники кирбииттэн тыыннаах тахсыбыта.

Родимир Максимов, РФ Дьоруойа: «Эккиэн биир биригээдэттэн сылдьабыт. Мин бастакы штурм, кини иккис. Билэбин уолаттар антах хайдах сэриилэһэллэрин. Киэн туттабын».

Алексей билигин реабилитационнай кииҥҥэ эмтэниини бара сылдьар, сотору кэминэн атаҕар протез оҥотторуохтаах. Саҥа дьоруой инникигэ былаана элбэх, ол иһигэр үөрэххэ туттарсар соруктаах, ол эрээри саха сиэринэн эрдэ кэпсэммэт, кэм көрдөрөн иһиэ диэн этэр.

Алексей Петров, РФ Дьоруойа: «Баҕа санаа элбэх. Дьоруой буолбуппуттан наһаа соһуйдум. Эрдэ эппиттэрэ, итэҕэйбэккэ сылдьыбытым, кырдьык буолбут».

Алексей Петров хорсун быһыыта, эр санаата, тулуура Арассыыйа историятыгар, бэриниилээх буолуу холобурун быһыытынан сурулунна.