Саха сирин учуонайдара өр сыл болдьохтоох оту үүннэрэллэр

53

Главное

Наука үлэһиттэрэ тыа хаһаайыстыбатыгар өҥөлөрө. Ханалас улууһугар Нөмүгүгэ баар научнай-экспирементальнай 30 нүөмэрдээх учаастагар сүөһү эбии аһылыгар, хороҕор муостаах иҥэмтэлээх аһы аһыырыгар туһуламмыт үлэлэр бараллар. Холобура, билигин манна туорахтаах уонна бобовай көрүҥ биир сыллаах отторо үүнэ-силигилии тураллар. Быйылгы сөрүүн, ардахтаах сайын төптөрүтүн үүнүүгэ тоҕоостоох диэн лаборатория тутаах үлэһитэ Алексей Неустроев кэпсиир.

Алексей Неустроев, СӨ ТХНЧИ сүөһү аһылыгын бэлэмниир лаборатория сүрүннүүр научнай үлэһитэ, тыа хаһаайыстыбатын наукатын хандьыдаата: «Сиикпит элбэх быйыл. Ситэрэ, уһуура буолуо дии саныыбын. Бу ардах түстэҕэ тохтообокко үүнэ-үүнэ турар. Миигиттэн даҕаны уһун буолуон сөп, сытан эрэ. Өрөспүүбүлүкэҕэ тарҕатан сүөһү эбии аһылыга буолуо».

Бу үлэлэр түмүктэрэ - хаһаайыстыбаларга тиийэр соруктаахтар. Маныаха Алексей Неустроев бииргэ үлэлиир, наукаҕа кэллиэгэтин кытары "Сарыал" диэн ааттаах бэйэлэрэ от саҥа суордун айан таһаарбыттара. Билигин кинилэр сиэмэни элбэтиигэ, тарҕатыыга үлэлииллэр.

Иван Бордеев, СӨ ТХНЧИ сүөһү аһылыгын бэлэмниир лаборатория лаборант-чинчийээччитэ, аспираан: «Бу тарҕатыы үлэтэ буола турар. Быйыл үчүгэй сыл буолан бу биир умнастан икки үүммүт».

Онон быйыл агрономнарга күн-дьыл туран биэрэн, быйыл үчүгэй үүнүүнү, элбэх сиэмэни ылар баҕалаахтар. Холобура, бу көрүҥ от 1 гектар иэннээх сириттэн 12 центнер хомуллар эбит буоллаҕына, бу күһүн маннааҕар өссө элбэҕи ылар сыаллаахтар. Оттон манна даҕатан эттэххэ, тустаах лаборатория 10 көрүҥ от арааһын айан таһаарбыта. Быйыл эмиэ саҥа оту оройуоннаатылар.

Валентина Алексеева, СӨ ТХНЧИ сүөһү аһылыгын бэлэмниир лаборатория сэбиэдиссэйэ, тыа хаһаайыстыбатын наукатын хандьыдаата: «Быйыл саҥа суорт оройуоннанна, Модун диэн. Бу суорт ходуһаҕа уонна мэччирэҥҥэ барар. Кыһыны, курааны тулуйар. Биир гектартан 30-35 центнерга тиийэр. Сиэмэтэ 1,5-2 центнер буолар».

Бу курдук наука үлэһиттэрин сайыҥҥы дьарыктарын саамай үгэнэ бара турар. Аны биир ыйынан хомуур кэмэ саҕаланыа.

Читайте также