Киин эҥэр өҥүрүк куйаас күннэр сатыылаатылар

Киин куорат 202 дьоҕус түөлбэтигэр баар сөтүөлүүр сиргэ бу күннэргэ киһи тобус-толору. Биирдиилээн итиэннэ бүтүн дьиэ кэргэнинэн дьон куйаастан куотан сөрүүкүү уу аттыгар кэлэр. Маныаха быйыл тустаах сөтүөлүүр сиргэ олохтоохтор сынньаналларыгар  бары усулуобуйаны тэрийэннэр дьон биир сөбүлээн сылдьар миэстэтэ буолбут. Итиэннэ туһаннаах бэрэбиэркэни ааспыт биир көҥүллэнэр сөтүөлүүр сир.

Сынньанар сир туһунан аҕыйах күннээҕитэ билэн кэлбит. Син куораттан тэйиччи, оттоох-мастаах, айылҕаҕа сынньалаҥ диэн сөбүлээбит.

Руфина Габышева, Дьокуускай куорат олохтооҕо: «Үчүгэй, былырыын куорат пляһыгар сылдьар этибит. Ким да тугу да төлөөбөт, гынан баран массыыналаах киһиэхэ үчүгэй».

Оттон киин куоракка уопсайа икки көҥүллээх сөтүөлүүр сир баар. Ол бу Сугун уонна 202 дьоҕус түөлбэҕэ баар пляж. Манна ууга анал бэлиэлэр, быыһааччылар үлэлииллэр. Маны тэҥэ шезлоннар, батуттар, саптар бааллар. Үлэһиттэр күнү быһа кэтии-маныы сылдьаллар. Итиэннэ туһааннаах биэдимистибэ уу эбийиэктэригэр куттал суох буолуутун хааччыйар. Оттон көҥүлэ суох сирдэргэ күннэтэ рейдэлэри тэрийэллэр.

Татьяна Степанова, СӨ ЫБММ дьоҕус суудуналарга судаарыстыбаннай инспиэксийэтин дьон уу эбийиэктэригэр сэрэхтээх буолуутун хааччыйар салаатын салайааччытын солбуйааччыта: «Сыл саҕаланыаҕыттан өрөспүүбүлүкэ үрдүнэн 21 киһи олоҕо ууга былдьанна, ол иһигэр икки оҕо. Ону тэҥэ 3 киһи сураҕа суох сүттэ Нам, Булун уонна Уус Майа оройуоннарыгар. Сүрүн төрүөтэ – көҥүллэммэтэх сирдэргэ сөтүөлээһин уонна суудунанан сылдьан».

Билиҥҥи туругунан өрөспүүбүлүкэ үрдүнэн 5 көҥүллэнэр сөтүөлүүр сир баар. Бу Дьокуускайга, Бүлүү куоратыгар уонна Аллараа Бэстээх бөһүөлэгэр. Бу сирдэри үлэлэтэр тэрилтэлэр бары бэрэбиэркэни ааһан, туһааннаах усулуобуйаны олохтообуттар. Маны тэҥэ Роспотребнадзор салалтата эмиэ көҥүлү биэриигэ уу боруобатын ылан бэрэбиэркэлиир.

Георгий Игнатьев, СӨ роспотребнадзор салалтатын бэлиэтэниигэ уонна көҥүлү биэриигэ кэтэбил салаатын салайааччытын солбуйааччы: «Бүгүҥҥү күҥҥэ 80 уу боруобата ылыллан турар. Микробиологическэй көрдөрүүтүнэн 2 уу ааспата, онтон санитарно-химическэй 4 боруоба ааспата».

Маныаха эрдэ этиллибит 5 сөтүөлүүр сирдэргэ уу боруобата нуормаҕа сөп түбэһэр диэн көрдөрбүт, онон Роспотребнадзор көҥүлүн эмиэ ылан олороллор. Туһааннаах хонтуруоллуур-кэтиир биэдимистибэлэр олохтоохтору көҥүллээх эрэ сирдэргэ сылдьыҥ диэн сүбэлииллэр.