Индигиир эбэ уута түһэн, хоромньуну ааҕыы тэтимирдэ

Дьокуускай общественнай киинин 4 этээһигэр общественнай палата хос көрөн Өймөкөөн улууһун биир дойдулаахтарын түмсүүтэ ыстаап тэрийэн үлэлэттэ.  Чэппиэр күн Өймөкөөнтөн улуус баһылыгын солбуйааччы Алексей Федотов кэлэ сырытта. Ыксаллаах быһыы-майгы эрэһиимэ биллэриллибитин кэннэ сокуонунан 3 күн иһигэр үп-харчы киириитигэр сайаапка түһэриэхтээхтэр. Ыстаап мунньаҕар мустубуттар туох-ханнык көмө бастакы уочарат ирдэнэрин, ону тиксэриини, тэрийиини дьүүллэстилэр.

Евгения Габышева, Өймөкөөн улууһун биир дойдулаахтарын түмсүүтүн чилиэнэ: «Бүгүҥҥү күҥҥэ иһэр ууга кыһалҕалаах олороллор. Уонна бензин, топливо өттүгэр. Эмп, халыҥ таҥас наада».

Ааспыт нэдиэлэ саҥата Өймөкөөн улууһугар өр кэмнээх ардахтар кэннэ хайа үрэхтэрэ, итиэннэ Индигиркэ өрүс хаатыттан тахсан улуус 5 нэһилиэгэр улахан уу киирэн, күнтэн күн уу таһыма үрдээн дьиэлэри ылла. Урукку 2013 сыллааҕы халааннааҕар быйыл хаһан да буолбатах уу кэлэн улахан иэдээни аҕалла. Балтараа тыһыынча киһи дьиэтэ-уота улаханнык эмсэҕэлээтэ, ынаҕа-сүөһүтэ былдьанна. Хоту сиргэ бу үлүгэр уу хаһан түһэн, кууран, кыстыкка бэлэм буолара бэрт уустук дьыала.

Алексей Федотов, Өймөкөөн улууһун баһылыгын бастакы солбуйааччы: «Бырабыытылыстыба уонна министиэристибэлэр бэлэм олороллор. Бастакы күнтэн сибээскэ бааллар».

Ыстаап бээтинсэттэн саҕалаан общественнай киинтэн Бестужев-Марлинскай уулуссатын 5 нүөмэрдээх дьиэтигэр көстө. Ол курдук общественнай кииҥҥэ 4 этээскэ дьон кэлэригэр табыгаһа суох диэн аадырыстарын уларыттылар.

Татьяна Николаева: «ДОСААФ дьиэтин иһирдьэ территориятыгар киирэҕин, онно бу маннык тутууга ыстаап дьиэлэннэ. Ааныгар 5 сыыппара диэн суруктаах. Манна кэлэн ким баҕалаах ууттан эмсэҕэлээбит дьоҥҥо көмөтүн аҕалыан сөп».

Иһэр уу, ас-үөл, эмп-томп, ууну хачайдыыр, дьиэни куурдар тэрил сүрүннээн наада. Ону тэҥэ харчынан көмөнү туһааннаах счекка ыытар кыах баар. Көмөнү тутааччы счетун реквизитын экраҥҥа көрөҕүт.

Мария Максимова, Өймөкөөн улууһун биир дойдулаахтарын түмсүүтүн чилиэнэ: «Соҕотохтуу хаалларбатылар. Өрөспүүбүлүкэ олохтоохторо кыра да буоллар көмөлөрүн киллэрэ тураллар».

Амарах санаалаах дьону-сэргэни, ууттаан эмсэҕэлээбит Өймөкөөн улууһун олохтоохторугар күүс-көмө буоларгытыгар ыҥыраллар.