Өймөкөөн уонна Муома оройуоннарыгар балаһыанньа уустук

Бу көстөр каадырдарга Өймөкөөн дэриэбинэтинэн тимир көлө барар суолунан, мотордаах уу аала устар. Маннык дэриэбинэ иһинэн суудунанан айанныыр балаһыанньа  турбута хас да күн буолла. Өймөкөөн улууһун Өймөкөөн, Куйдуһун, Сордоҥноох, Томтор нэһилиэктэригэр уу таһыма үрдээбит төрүөтүттэн дьон олорор дьиэлэрэ, тэлгэһэлэрэ ууга барда. От ыйыгар ууга барыы содула - ый устата тохтоло суох түспүт дохсун ардахтар буолаллар.

Өймөкөөн оройуонугар балаһынньа маннык эбит буоллаҕына  Муома улууһугар эмиэ уу дьон олбуордарыгар киирдэ. Эмиэ өр кэм тохтоло суох түспүт ардах суодулуттан Индигиир өрүс  уонна Муома үрэх уутун таһыма үрдээн хас да нэһилиэнньэллэх пууннар Соболоох, Буор-Сыһыы. Кулун -Өлбүт уонна улуус киинэ Хонууга уу киирдэ.

Мира Старкова, "Муома улууһа" МТ дьаһалтатын пресс-сулууспатын исписэлииһэ: «Хонуу, Соболоох, Буор Сыһыы уонна Кулун Өлбүт бөһүөлэктэригэр дьону эвакуациялыыр пууннар тэриллэннэр, нэһилиэк дьаһалталара бу пууннарга наадалаах тэриллэри хааччыйаллар».

Билигин ыксаллаах быһыы-майгы балаһыанньата Өймөкөөн улууһугар сытыылаан турар. Онон туох баар күүс онно ууруллар. Тустаах улууска 672 киһини биирдэ батарар 7 эвакуционнай пууннар үлэлииллэр. Манна билигин 33 киһи быстах кэмҥэ олорор, 52 киһи аймахтарынан эвакуациялааннылар. Билигин миэстэтигэр быыһааччылар үлэлииллэр.

Андрей Никифоров, ЫБММ СӨ салайааччытын солбуйааччы: «Индигирка өрүскэ халаан уута элбэҕинэн сибээстээн, бүгүҥҥү күҥҥэ главнай управение оперативнай группата уонна МЧС быыһааччылара Өймөкөн улууһугар көттүлэр. Оперативнай группа администрацияны, нэһилиэнньэни кытта үлэлэһиэҕэ».

Уопсайа ардах халааныгар 3 улуус, ол эбэтэр Өймөкөөн, Муома уонна Абый таарыллыннылар. Маныаха Алдан өрүс уутун таһыма үрдээн Томпо улууһугар эмиэ куттал үөскүөн сөп диэн Дмитрий Садовников салайыылаах оперативнай мунньахха иһитиннэрдилэр. ВКС түмүгүнэн үгүс элбэх сорудахтар бэрилиннилэр.

Дмитрий Садовников, СӨ бырабыытылыстыбатын бэрэссэдээтэлин бастакы солбуйааччыта: «Өймөкөөнтөн аллараа Муома, Абый улууһугар эмиэ кэлэ турар. Манна 3 оройуоҥҥа уу тахсыытын бэлиэтиибит. Бу түмүгэр биһиги дьоннор хорумньулара билигин аахтахха 700 киһиэхэ тиийэр. 160 киһини эвакуациялаатыбыт».

Оттон тустаах улуустарга маннык балаһынньа 2 ый нуормалаах ардах түһүүтүттэн, үрэхтэр, өрүстэр ууларын таһыма үрдээбитин түмүгэ буолар. Өрөспүүбүлүкэ бырабыытылыстыбата балаһыанньаны хонтуруолга тутар.