Дьокуускайга "Саха сиригэр үлэлээ" диэн ыччат бэстибээлэ ыытылынна

Тутуу, медициинэ, бырамыысылыннас, ойуур хаһаайыстыбата, сокуону араҥаччылыыр уорганнар курдук араас салаа тэрилтэлэрэ ыччакка бэйэ хайысхаларын сиһилии сырдаталлар. Бары тэрилтэлэр бэрэстэбиитэллэрэ ох курдук оҥостон кэлбиттэр, көрдөрүүгэ араас аныгы технологиялары туһанан маастар-кылаастары ыыталлар. Оттон үгүс кэрэ аҥар өрөспүүбүлүкэ биир бөдөҥ авиа хампаанньатын көрдөрүүтүгэр муһунна.

Манна номнуо 8 сылын бортпроводнигынан үлэлиир Анжела Винокурова бэйэ идэтин туһунан ыччакка сырдатар. Бортпроводник үлэтин үтүө-мөкү өрүттэрин, туох ирдэнэрин сиһилии кэпсиир. Даҕатан эттэххэ бу идэ урут уруккуттан элбэх эдэр кыргыттар ыра санаалара буолар. Маныаха тустаах авиа хампаанньа маннык хабааннаах тэрээһиҥҥэ бастакы кыттыыта, онон көтөр аалга үлэлиэн баҕалаахтарга сиһилии билсэллэригэр кыах баар буолла.

Анжела Винокурова, бортпроводница: «Биһиэхэ сүрүн ирдэбилэр: 27 сааска дылы, үчүгэй көстүүлээх уонна кытаанах доруобуйалаах, үөрэхтээх уонна омуктуу, сахалыы уонна нууччалыы билэр буолуохха наада».

Медиссиинэ салаатыгар эмиэ үгүс үлэ биэрээччи тэрилтэ итиэннэ абитуриеннары көрдүүр үөрэх кыһалара бааллар. Манна хайысхаларынан бастакы суһал көмөнү оҥорууну, эдэр ийэҕэ кыһыл оҕону хайдах көрөрү-истэри, итиэннэ доруобуйаларынан хааччахтаах дьону көрөр социальнай үлэһит идэтин туһунан көрдөрүүлээх кэпсииллэр. Холобура өрөспүүбүлүкэтээҕи социальнай хааччыйыы биир кэлим киинэ фельдшергэ, медиссиинэ сиэстэрэтигэр наадыйар эбит. Маныаха үлэлиэн баҕалаахтары бэйэлэрэ үөрэтэллэр эбит.

Антонина Андреева, Өрөспүүбүлүкэтээҕи социальнай хааччыйыы биир кэлим киинин үлэһитэ: «Школа ухода диэн баар. Кырдьаҕас, сытар дьоннору сөптөөхтүк көрөргө үөрэтэр. Сайаапка биэрэн баран кэлэн үөрэниэххэ сөп».

Оттон ордук элбэх үлэ миэстэтин промышленнай бөдөҥ хампаанньалар таһаарбыттар. Манна дойду таһымнаах улахан тэрилтэлэр бэрэстэбиитэллэрэ кэлбиттэр. Холобура, Хабаровскай, Иркутскай куорат хампаанньалара бааллар.

Лариса Елисеева, көмүс хостуур хампаанньа бэрэстэбиитэлэ: «У нас ряд профессий, которые требуют опыта и квалификаций, есть работа для начинающих ребят, например, на наших фабриках, на оборудовании металлургическом, мы готовы обучить и интегрировать с нуля».

Бөдөҥ тэрээһиҥҥэ уопсайа 16 салааҕа барыта 40 тахса тэрилтэ кыттыыны ылла. Үгүс ыччат билсэн инники идэлэрин талалларыгар дьаарбаҥка көмө буолла.