Саха сиригэр уу суолунан таһаҕаһы тиэрдии салҕанар

Бырабыытылыстыба бэрэссэдээтэлин бастакы солбуйааччы Дмитрий Садовников тустаах хамыыһыйа мунньаҕар быйылгы навигация кэмигэр таһаҕаһы тиэрдии хаамыытын кэтиир. Мунньах кыттыылаахтара өрүстэр туруктарын, оттугу, уматыгы тиэрдии, флот, чох шахтатын үлэтин дьүүллэстилэр. Өрөспүүбүлүкэ өрүстэринэн навигация саҕаланыаҕыттан уопсайа 456 тыһыынчаттан тахса туонна олоҕу-дьаһаҕы хааччыйар таһаҕас тиэйилиннэ. Бу көрдөрүү уопсай былаантан 30-тан тахса бырыһыанын ылар. Оттон быйылгы сыллааҕы былаан туһунан этэр буоллахха, бу сайын устата уунан уопсайа биир мөлүйүөнтэн тахса туонна таһаҕаһы тиксэрэр соруктаахтар.

Никита Павлов, СӨ нэһилиэнньэҕэ олоҕор-дьаһаҕар куттал суох буолуутун хааччыйыы миниистирин солбуйааччы: «Быйыл 1148400 туонна таһаҕас буолар. Бүгүҥҥү күҥҥэ тиэниллибит таһаҕас 456600 туонна, тиэрдиллибит 375700 туонна».

Түргэнник уулара түһэр өрүстэринэн оттугу тиэйиини үмүрүттүлэр. Ол курдук Амма өрүһүнэн чох таһыыта түмүктэннэ. Оттон Бүлүү өрүскэ газоконденсаты тиэйии-таһыы үлэтэ эмиэ бүттэ.  От ыйын 20 күнүттэн арктическай навигация түһүмэҕэ саҕаланыа.

Никита Павлов, СӨ нэһилиэнньэ олоҕор-дьаһаҕар куттал суох буолуутун хааччыйыы миниистирин солбуйааччы: «Арктика навигацията саҕаланан эрэр, кэлэр нэдиэлэттэн номнуо саҕаланар. Уопсайа 300000 тахса туонна. Яна, Халыма, Индигирка өрүстэринэн тиэйии барыаҕа. Флотпутун бэлэмнээһинэ бара турар».

Ааспыт сылы кытта тэҥнээтэххэ, таһаҕаһы тиэрдии көрдөрүүтүгэр кыра бытаарыы баар. Маныаха сүрүн кыһалҕанан үп-харчы боппуруоһа буолар.

Дмитрий Садовников, СӨ Правительствотын бэрэссэдээтэлин бастакы солбуйааччы: «Сүрүн төрүөтэ үп-харчы. Хаһаайыстыбыннай тэрилтэлэр бэйэ-бэйэлэрин кытары төлөһүү. Ол иһин бу үлэҕэ болҕомто уура сылдьабыт. Үп-харчы министиэристибэтигэр боротокуолунан сорудах биэрдибит. Бу үлэни өссө күүһүрдэр курдук уонна навигацияҕа үлэлии сылдьар тэрилтэлэргэ уонна министиэристибэлэргэ эбии харчыны көрөллөрүгэр уонна тириэрдэллэригэр».

Быйылгы навигацияҕа уопсайа 722 суудуна, 3 аҥар тыһыынча киһи үлэлии-хамсыы сылдьар.

Саха сиригэр хотугу тиэйии уратыта диэн таһаҕас сүрүн кээмэйэ кылгас навигация кэмигэр өрүс суолунан тиэллэн, салгыы кыһыҥҥы суолларынан тиэрдиллэр.  Бу сыл ахсын чуолкай систиэмэни уонна анал хонтуруолу ирдиир олус уустук тэрээһин буолар. Бу нэдиэлэ бүтүүтэ арктическай навигация саҕаланыаҕа.