Хаҥалас улууһун киинигэр суол өрөмүөнүн үлэлэрэ ыытылла тураллар

Улахан кыамталаах тиэхиникэ аспаал урукку тобоҕун ыраастыыр. Оттон манна сотору кэминэн сабыс-саҥа суол тэлгэниэ. Суоппардарга да, олохтоохторго да Покровскай киин аартыгынан айанныыр олус үчүгэй буолуоҕа.

Семён Строев, маастар: «Көннөрө сылдьабыт, барытын бытарытан тэҥнээбиппит. Онтон аспааллыахтаахпыт. Былыыһааҕа диэри онтон Исаева уулуссатыгар».

Чахчы Покровскай куоракка уруккуттан буолбатах үлэлэр ыытылаллар. Новай уулуссаҕа уонна быйыл 110 сыллаах үбүлүөйдээх суруйааччы Исай Никифоров аатынан уулуссаҕа, маныаха революционер, полит диэйэтэл Сергей Киров аатын сүгэр уулуссаҕа уонна Зинаида Иноземцева аатынан учаастактарга өрөмүөн үлэлэрэ бараллар.

Өрөмүөн үлэлэрэ уопсайа 4 уулуссаҕа бара тураллар. Ол эбэтэр 2, 135 килэмиэтир уһуҥҥа. Оттон бу аартыктар 90-с сыллартан өрөмүөннэмэккэ турбуттара. Хата, олохтоох дьаһалта субсидия ыларга куонкуруһу  кыайан, үп онтон көрүлүннэ. 

Александр Новиков, Покровскай куорат дьаһалтатын суол салаатыгар сүрүннүүр исписэлииһэ: «Уопсай суумата 50 мөл. солк. Бу үлэ Саха сирин суолларын пуондатыттан уонна олохтоох бүдьүоттэн үбүлэнэр. Үлэ былаан быһыытынан күһүн түмүктэнэр».

Маныаха Кыл-Бастаах оройуонугар саҥа сүүрээн киллэрии рескайлинг ньыматынан суолу онордулар. Киин улуусаларга эмиэ итинник хайысхалаах үлэлэр ааһаллар итиэннэ саҥа аспаал. Онон манна саамай үөрэр-кэтэһэр дьон олохтоохтор буолаллар.

Антонина Ильина, Покровскай куорат олохтооҕо: «Быйылгы сылга үлэҕэ киирбититтэн олохтоохтор сүрдээҕин үөрэбит. Уулуссабыт оҥоһуллубатаҕа 90-с игин сыллартан буолуо. Үчүгэй буолуо диэн эрэнэбит».

Бу курдук Хаҥалас улууһун киинигэр, куораты тупсарыыга үлэ күөстүү оргуйар.