Үөһээ Бүлүү улууһуттан сылдьар Алексей Петровка Арассыыйа Дьоруойун аатын иҥэрдилэр

Дойду Дьоруойа үрдүкү наҕараада иҥэриллибитин туһунан үтүө сураҕы Алексей Петров Амма улууһун Чакыр нэһилиэгэр сылдьан иһиттэ. Алексей госпиталга өр кэмнээх эмтэнии кэнниттэн, билигин дойдутугар эргиллэн кэлэн, Чакырга  доҕоругар ыалдьыттыы сылдьар.

Алексей Петров, РФ Дьоруойа: «Бэйэм да соһуйдум Арассыыйа Дьоруойун биэрбиттэрин. 6 чыыһылаҕа биллибитэ Дьоруой буолбутум».

Алексей Үөһээ Бүлүү улууһун Маҕаас нэһилиэгэр 1984 сыллаахха төрөөбүтэ. Бииргэ төрөөбүт иккиэлэр, балтылаах. Армия кэннэ дьонугар кэтэх хаһаайыстыба көрүүтүгэр күүс-көмө буолбута, кыратыттан бултуурун, айылҕаҕа сылдьарын сөбүлүүрэ. Анал байыаннай дьайыыга былырыын от ыйыгар хантараак баттаһан барбыта.

Нарыйа Петрова, Маҕаас нэһилиэгин дьаһалтатын сүрүннүүр исписэлииһэ, Алексей Петров тастыҥ эдьиийэ: «Уолбутун, бырааппытын Арассыыйа Дьоруойа буолбутун билэммит нэһилиэк дьоно бары үөрдүбүт, долгуйдубут. Бырааппыт хорсун быһыыта сыаналаммытынан эҕэрдэлиибит уонна киэн туттабыт».

Медведь диэн позывнойдаах Алексей Петров анал байыаннай дьайыыга хорсун быһыыны көрдөрбүтэ. Кини өстөөх позицияларыгар саба түһэн, хас да пулеметнай туочуканы, уонунан боевигы уонна тиэхиникэни тус бэйэтинэн суох оҥорбута. Хас да күннээх кытаанах кыргыһыылар кэмнэригэр ыараханнык бааһыран, икки атаҕын сүтэрбитэ, ол эрэн инники кирбииттэн тыыннаах тахсыбыта. Ил Дархан Алексей Дьоруой буолбут күнүгэр эрийэн эҕэрдэлээтэ. Алексей Айсен Сергеевичка уһаайба ылан сүөһү иитэн хаһаайыстыба тэринэр баҕалааҕын эттэ.

Айсен Николаев, СӨ Ил Дархана: «Киэн туттабыт бу курдук дьоннордоохпутуттан».

Ил Дархан Алексей хаһаайыстыба тэринэр хайаан да көмөлөһүөхпүт диэн эрэннэрдэ. Шторм-2 39-с мотострелковай биригээдэ байыаһа Алексей Саха сиригэр 12-с Арассыыйа Дьоруойунан буолла.

Александр Колесов, РФ Дьоруойа: «Алексейы кытта билсибиппит ыраатта. Бу званиены ылыахтааҕын кэтэспиппит өр буолла. Алексей анал байыаннай дьайыыга сылдьан хорсун быһыытын иһин маннык үрдүк ааты ылла».

Ефрейтор Петров хорсун быһыыта, эр санаата, тулуура Арассыыйа историятыгр, бэриниилээх буолуу холобурун быһыытынан сурулунна.