Манчаары оонньууларын ат сүүрдүүтүгэр 50-тан тахса сүүрүк ат кытынна

Старт бэриллэннэ, аттар түһүнүллэр. Бастакынан сүүрүк аттар 1600 миэтирэҕэ сүүрдүлэр. Бу дистанцияҕа Хаҥалас улууһун ата Евр бэйэтигэр тэҥнээҕин булбата. Кини маннык улахан сүүрүүлэргэ кыттыбыта иккис сыла. Бу кэм иһигэр элбэх ситиһиилэрдээх,  көрдөрүүтэ  үчүгэй.

Наталья Янушева, Хаҥалас улууһун хамаандата: «Саха сиригэр кэлбитэ үһүс сыла буолла. Кыайыыга эрэллээх этибит, кыайаммыт үөрэн-көтөн турабыт».

Күрэс төрүт көрүҥнэригэр 22-с Манчаары оонньууларын ат сүүрдүүтүгэр быйыл барыта 12 хамаанда, 50-тан тахса сүүрүк ат кытынна. Барыта уон араас дистанцияҕа аттар сүүрдүлэр.

Эдуард Рехлясов, СӨ ат сүүрдүүтүн спордун федерациятын бэрэсидьиэнэ: «Форс-мажор быһыытынан 9 чыыһылаҕа Ытык-Күөлгэ буолбатаҕа. Оргкомитет быһаарыытынан манна Үс-Хатыҥҥа буолла. Манчаары оонньуута бириис пуондалаах. Ол курдук, федерация уонна спонсордар бириис туруордулар – 12 убаһа, 500 тыһ. сертификатынан харчы уонна хас биирдии хамаандаҕа 1 туонна эбиэс».

Трибуна толору. Көрөөччүлэр төһө да халлаан уларыйдар өрө күүрүүлээх тыҥааһыннаах киирсиилэри биир тыынынан көрдүлэр.

Манчаары оонньууларыгар ат сүүрдүүтүн көрүҥэ кэнники киирбитэ. Бу иккис төгүлүн ыытыллар. Саамай күүтүүлээх уонна кэтэһиилээх сүүрүүнэн буолаллар диэн тэрийээччилэр бэлиэтииллэр. 

Николай Афанасьев, СӨ тыа хаһаайыстыбатын миниистирин солбуйааччы, бас судьуйа: «Ат сүүрдүүтэ киирбитэ интириэһинэй. Саха дьоно бу спорду сөбүлүүр. Ат спордун күүһүрдэн байытан биэрэргэ диэн».

Оттон бу дистанцияҕа Сунтаар улууһун сүүрүк ата Партия бастаата.  Өрөспүүбүлүкэҕэ биир биллэр, уопуттаах маастар-жокей Валентин Иванов буолар, онон кыайыыбытыгар эрэллээх этибит диэн улуус делегацията үөрэ кэпсиир.

Владимир Анисимов,  Сунтаар улууһун хамаандата: «12 сүүрүүлээх, онтон иккитигэр эрэ икки миэстэлээх уонна барытыгар бастакы миэстэлэр. Өрөспүүлүкэҕэ үчүгэйдик биллэр ат. Бириис – Хаҥалас улууһуттан убаһа».

Оттон уопсай түмүгүнэн бу ат сүүрдүүтүгэр муҥутуур кыайыылааҕынан Мэҥэ Хаҥалас улууһа буолла. Иккис миэстэни Нам улууһа, оттон үһүс миэстэни Таатта улууһун хамаандата ылла.