Манчаары оонньуулара күрэс төрүт көрүҥнэригэр тыҥааһыннаах күрэхтэрэ бара тураллар

Манчаары оонньууларын бастакы күрэстэһээччилэрэ Николай Мординов аатынан лиссиэй түһүлгэтигэр бастыыр иһин илин-кэлин түһүстүлэр. Төрүт оҕунан ытыыга эдэрдиин-эмэнньиин уопсайа 96 киһи кыттыыны ылла. Күөх Ньурбаттан сылдьар Далбар хотуттарга киирсэ сылдьар Кэрэли Токос Манчаары оонньуутугар төрөөбүт улууһугар бу күрэс көрүҥэр бастакы кыһыл көмүс мэтээли аҕалары ситистэ. Таатта ытык сирэ кыайыыны түстээтэ.

Кэрэли Токос, күрэс төрүт көрүҥнэригэр Манчаары оонньууларын кыайыылааҕа: «Ытар сирбит олус үчүгэй диэн үөрэн турабыт. Наһаа үчүгэйдик көрүстүлэр, ыалдьытымсах эбиттэр».

Гиирэ көрүҥэ үгэскэ кубулуйан Манчаары оонньууларыгар курэсчиттэри күөн көрсүһүннэрдэ. Оонньуу саамай бастакы кыайыылаҕынан, Таатта улууһун спордун историятыгар кыһыл көмүс  буукубанан суруллары ситистэ Сардаана Тарасова. Кини 63-тэ гиирэни аанньан тус рекордун олохтоото.

Сардаана Тарасова, күрэс төрүт көрүҥнэригэр Манчаары оонньууларын кыайыылааҕа: «Саҥа саала буолан үчүгэй. Биир нэдиэлэ курдук дьарыктамыппыт, номнуо дьиэбит-уоппут курдук буолан күүс-сэниэ биэрэн. Бэйэм дойдум буолан ийэм аҕам баар, ыраахтан аймахатырым кэлбиттэр, доҕотторум баар буоланнар наһаа үчүгэй. Кыттааччылар күүстээхтэр, ол гынан баран кыайыыны мин ыллым».

Дьулуруйар Ньургун Боотур стадион биир да күн тохтоло суох аана тэлэччи арыллан турар. Манна мас тардыһыыга, хапсаҕайга уонна чэпэчки атлетикаҕа күрэхтэр ааһаллар. Сүүрүгэ кимиэхэ да иннин биэрбэтэ Сунтаар улууһуттан сылдьар Наталья Леонтьева. 4 сыл буолан баран Ытык-Күөлгэ барыларыттан бастыҥын итэҕэттэ. Уопсайа 14 ааттаах сүүрүүктэр илин-кэлин түһүстүлэр.

Мас тардыһыыга тыҥаһыннаах киирсиилэр бу спорду сэҥээрээччилэри соһуттулар. Ол курдук, бастыы сылдьбыт күрэстэһээччилэр, хотторуу хомолтотун биллиллэр. Ол эрэн сорохтор, Кыайыы амтанын билиллэр 5 төгүлүн спартакаиадаҕа кыттыыны ыла сылдьар, Сунтаартан төрүттээх Федор Федоров Манчаары мэтээлин хаһаайынынан буолла.

Фёдор Фёдоров, күрэс төрүт көрүҥнэригэр Манчаары оонньууларын кыайыылааҕа: «Бэсиһин кыттабын, Саха сирин олимпиадатын курдук. Кыайыыга бары бэлэмнээх кэллибит, дьарыктанан».

Маныаха бу күн Хотугу күрэс төрүт көрүҥэр кыайыылаахтар ааттара билиннэ эр дьоҥҥо Чурапчыттан Михаил Соловьев, дьахталларга Нерюнгриттан Илона Прудникова, эдэр ыччакка Вадим Туприн Анаабыртан, кыргыттарга Валерия Рожиа Нерюнгриттан, бэтэрээннэргэ эмиэ Нерюнгриттан Николай Артемьев кыайыы өрөгөйүн биллиллэр. Оттон маны барытын 300-тэн тахса судьуйа болҕомтолоохтук кэтээн-манаан судьуйалыыр.

Ариан Тарасов, күрэс төрүт көрүҥнэригэр Манчаары оонньууларын бас судьуйаны солбуйааччы: «Балаһыанньанан 4 бөлөххө арахсан тураллар улуустар, хамаандалар. Түмүгү онон таһаарабыт, бөлөхтөрүнэн туспа Манчаары муҥутуур кыайыылахтара уонна миэстэлэхтэрэ буолаллар».

Хас да көрүҥ түмүктэнэн, аны Манчаары онньууларын сүрүн тыҥааһыннаах киирсиилэрэ салҕаналлар.