Дьокуускайга "Саха сиригэр үлэлээ!" диэн ыччакка анаммыт улахан үлэ бэстибээлэ арыллыа

Саха сиригэр үлэлээ бастакы бэстибээл от ыйын 16 күнүгэр сэрэдэҕэ Үлэ кыбаарталын дьиэтигэр ыытыллыаҕа. Бөдөҥ тэрээһин сүрүн сыалынан эдэр исписэлиистэри өйөөһүн, аныгы үлэ ырыынагын ирдэбилигэр бэлэмнээһин буолар. Бэстибээл идэ дьаарбаҥкатын быһыытынан эрэ буолбакка, киэҥ хабааннаах, хас даҕаны хайысханы хабар, үөрэтэр, күрэхтэһэр, аралдьытар, сомоҕолуур киэптээх ыытыллыаҕа.

Анастасия Позднякова, СӨ нэһилиэнньэ дьарыктаах буолуу госкэмитиэтин бэрэссэдээтэлин бастакы солбуйааччы: «Өрөспүүбүлүкэҕэ баар вакансиялар бары баар буолаллар. Сүрүн элбэх үлэһиккэ наадыйар тэрилтэлэр кэлиэхтэрэ уонна министиэристибэлэр вакансияларын илдьэ кэлэн олоруохтара».

Саха сиригэр уопсай үлэтэ суох киһи ахсаана 25  тыһыынча кэриҥэ киһи. Онтон учуокка турааччытын ахсаана икки тыһыынчаттан тахса. Балаһыанньа бу кэнники сылларга тупсан турар диэн  нэһилиэнньэ дьарыктаах буолуу судаарыстыбыннай кэмитиэтигэр иһитиннэрэллэр. Үлэ ырыынагар рабочай идэлээх дьоҥҥо наадыйыы үрдүк.

Георгий Борисов, СӨ дьарыктаах буолуу госкэмитиэтин бэрэссэдээтэлин солбуйааччы: «Кылгас кэмнээх үлэлэри, бэйэ дьыалатын арыныыга көмөнү, эбии профессиональнай үлэ ырыынагар сөп түбэһэр идэҕэ үөрэттэрэн үлэ булларыахпытын сөп».

Моя работа Дьокуускай нэһилиэнньэтин дьарыктаах буолууга киинигэр күннэтэ ортотунан 30 киһи сылдьар. Ким үлэ миэстэтин ыйыталаһар, ким учуоккка тураары, ким докумуон аҕалар, ким справка ыла кэлэр. Билигин сайыҥҥы кэмҥэ быстах үлэ миэстэтигэр, итиэннэ үөрэтии куурустарын ааһыыга ыйыталааһааччы элбэх. Үөрэтии саҥа бырагыраамалара муус устар ыйтан киирэн үлэ барар.

Анна Турантаева, Дьокуускай нэһилиэнньэтин дьарыктаах буолуу киинин бастакы категориялаах психолога: «Икки бырагырааманан үөрэтэбит. Өрөспүүбүлүкэтээҕигэ учуокка турбут эрэ дьоннор үөрэниэхтэрин сөп. Онтон федеральнай бырагыраамаҕа учуокка турбун уонна атын категориялар эмиэ үөрэниэхтэрин сөп».

Нэһилиэнньэ дьарыктаах буолууга кэмитиэтэ үөрэҕин саҥа бүтэрбиттэр үлэнэн хааччыллалларын кэтиир. Былырыын 10 тыһыынчаттан тахса ыччат бүтэрбититтэн 57 бырыһыана үлэнэн хааччыллыбыт. Быйыл 12 тыһыынча выпускник үөрэҕин бүтэрэн исписэлиис буолла. Оттон 2030 сылга диэри ыччаты үлэнэн хааччыйыы 100 бырыһыаҥҥа тиэрдэр сорук турар.