Манчаары оонньууларыгар Таатта улууһугар элбэх эбийиэк тутуллан үлэҕэ киирдэ

22-с төгүлүн ыытыллар Манчаары оонньууларын уота саҥа Дьулуруйар Ньургун Боотур стадиоҥҥа сыдьаайан, күрэс төрүт көрүнэригэр оонньуу саҕаламмытын туоһулуур. Онтон бу уматыы үрдүкү чиэһигэр тигистэ Таатталар биир чаҕылхай спортсменнара Игнат Андросов.

Арыллыы сиэрэ-туома өрөспүүбүлүкэ бары муннугуттан үгүс дьону түмтэ. Ыраахтан-чугастан хас эмэ тыһынчанан киһи кэлбитэ оонньуу чахсы улахан суолталааҕын, Саха норуотун биир баар суох сүдү тэрээһинэ буоларын туоһулуур.

История кэрэһэлииринэн Манчаары оонньуулара 1968 сыллаахха дойду уонна Саха сирин физичесай култуураҕа уонна спортка үтүөлээх үлэһитэ Афанасий Алексеев көҕүлээһининэн олоххо киирбитэ. Бу кэмтэн ыла 4 сыл буола-буола норуот дьоруойа Баһылай Манчаары спартакаидата ыытыллар.

Айсен Николаев, CӨ Ил Дархана: «Манчаарыбыт оонньуута бүттүүн Арассыыйа, бүттүүн аан дойду сэҥээриитин ылан бу бүгүн 22-с төгүлүн ыытан эрэбит».

Оонньуу арыллыыта  "Кыайыыга 11 хардыы" уус-уран дьүһүйүүтэ дьон кутун-сүрүн тутта. Сүрүн режиссерынан, Таатталар киэн туттар уоллара Роман Дорофеев туруоруута буолар.

Оонньуулар чэрчитинэн Таатта улууһугар саҥа  баараҕай эбийиэктэр үлэҕэ киирдилэр. Онтон биирдэстэрэ тыа сиригэр суох спорт дыбарыаһа. Маныаха сана стадион уонна үгүс тутуу үлэҕэ киирдэ.

Айсен Николаев, CӨ Ил Дархана: «Спартакиадаҕа бэлэмнэнэн элбэх тутуулар бардылар. Социальнай эйгэҕэ поликлиниканы ааттыахпын баҕарабын, Мординов аатынан лицей саҥа дьиэтин уонна күөл тула набережнай тутуллан Ытык-Күөл киин өттө даҕаны, кытыыта даҕаны бэркэ уларыйда».

Оттон быйылгы Манчаары оонньууларыгар уопсайа 11 күрэс төрүт көрүҥнэригэр тыҥааһыннаах киирсиилэрэ ааһыахтара. Бастакы күн саха оҕунан ытыыга күрэх ыытыллынна. Маныаха бу күн спортсменнарга маастар буолбуттарын туоһулара туттарылыбыттара.

Кэрэли Токос, СӨ төрүт оххо күрэһин маастара: «Муус устарга маастарбын ылыбытым, туоһубун ылан бүгүн үөрэн турабын. Наһаа үчүгэйдик көрүстүлэр, ыалдьытымсах эбиттэр».

Ыстаҥа көрүҥэ үгүс спотрменнары түмтэ. Саҥа спорт дыбарыаһыгар бастакы күн иҥиирдээх атахтаах күрэстэһээччилэри күөн көрсүһүннэрдэ.

Георгий Пугачев, Чурапчы улууһун сүүмэрдэммит хамаандатын спортсмена: «Сүрдээх үчүгэй дыбарыас тутуллубут, күрэхтэһэргэ усулуобуйа барыта баар. Бэйэбит үрдүк чыпчаалларбытын куоһарар гына күрэхтэһэргэ бэлэммит».

Чахчы, Таатта ытык сиригэр спорт бырааһынныга үрдүк таһымнаахтык ыытылларыгар усулуобуйа барыта тэриллибит. Манчаары оонньуулара хас биирдии кэлбит ыалдьыкка үйэ саас тухары өйүгэр хаалар курдук тутуһан үлэлииллэр, оонньууну тэрийэллэр.