ХИФУ ботаническай саадыгар сүүһүнэн көрүҥ мас, сибэкки үүнэр

Бу клен Гиннала диэн мас. Бу маһы Соликамск куораттан анаан-минээн ботаническай саадка бэлэх гына аҕалбыттар. Бу бырайыак олоххо киирэригэр элбэх үлэ ыытыллыбыта, олус суолталаах уонна дириҥ ис хоһоонноох буолар диэн ботаническай саад үлэһиттэрэ кэпсииллэр.

Александр Кононов, М.К.Аммосов аатынан ХИФУ ботаническай саадын дириэктэрин солбуйааччы: «300 сыл аннараа өттүгэр Уһук Илинтэн Ураалга тиийбит клен төрүөҕэ».

Аны аҕыйах сылынан бу мас улаатан, киэркэйэн ботаническай саад өссө биир ураты кэрэ көстүүлээх маһа буолуоҕа диэн үлэһиттэр эрэнэллэр.

Александр Кононов, М.К.Аммосов аатынан ХИФУ ботаническай саадын дириэктэри солбуйааччы: «Биэс сылынан 1,5 миэтэрэ буолуоҕа, онтон бытаарыа уонна 20 сылынан 3-4 миэтэрэ буолуо. Улахан мас буолбатах, гынан баран наһаа кыраһыабай».

Оттон бу декоративнай үүнээйилэр учаастактара. Эриэккэс үүнээйилэр, мааны сибэккилэр үүнэн-силигилээн тураллар. Күн бүгүн ботаническай саадка 500-тэн тахса араас күөх үүнээйилэр үүнэллэр.  Ботаническай саад сылын аайы үүнээйи көрүҥнэрин элбэтэн иһэр.

Людмила Кралина, М.К.Аммосов аатынан ХИФУ ботаническай саадын агранома: «Арааһынайдар бааллар, кэлиилэр гибриднайдар. Саха сиригэр кылгастар үүнэллэр».

Ботаническай саад үүнээйилэри чинчийэн үөрэтэрин таһынан, дьоҥҥо-сэргэҕэ сырдатар-үөрэтэр үлэни эмиэ ыытар. Манна араас интэриэһинэй маастар-кылаастар, семинардар, быыстапкалар куруук ыытылаллар.

Людмила Кралина, М.К.Аммосов аатынан ХИФУ ботаническай саадын агранома : «Биһиэхэ субуота аайы черемуха сибэккилэрин дьоннор кэлэн көрөллөр, күүлэйдииллэр, тэрээһиннэр буолаллар. Хас субуота аайы арааһынай тэрээһиннэри толкуйдуубут».

Оттон эһиил Хотугулуу-Илиҥҥи федеральнай университет ботаническай саада үбүлүөйдээх 25 сылын бэлиэтиир. Бэлэмнэнии үлэтэ номнуо саҕаламмыта. Үбүлүөйдээх сылга научнай конференциялар, кинигэ сүрэхтэниитэ уонна да атын тэрээһииннэр ыытыллыахтара. Элбэх ыалдьыт, учуонайдар, аграномнар кэлэллэрэр күүтүллэр.