Дьокуускайга СПИД киин анаалыстары босхо тутар аахсыйаны тэрийэр

Ньурба улууһуттан Дьокуускайга кэлэ сылдьар Валентин Иванов дьиэ кэргэнин кытта сынньалаҥ пааркатыгар сылдьан босхо анализ туталларын истэн кэллэ. Валентин доруобуйаны көрүнэр хайаан да наада диэн этэр.   

Валентин Николаев, Ньурба улууһун олохтооҕо: «Наадалаах бөҕө буо. Биллибэккэ сылдьар ыарыыларгын билиэххин сөп. Сылга биирдэ баран көрдөрүнүөххэ наада. Быйыл эмиэ диспансеризация ааһыахтаахпын».

СПИД уонна инфекционнай ыарыылары сэрэтэр уонна утары охсуһар өрөспүүбүлүкэтээҕи киин нэһилиэнньэҕэ өйдөтүү үлэтин көхтөөхтүк ыытар. Бу сырыыга куорат сынньалаҥ пааркатыгар кутталлаах 5 инфекционнай ыарыыга анализтары босхо тутар акцияны тэрийдэ.

Константин Данилов, СПИД кииҥҥэ медбрат: «Тарбахтан хаан ылабыт уонна гепатит В, С, сифилис, туберкулез уонна ВИЧ анаалыстыыбыт. Ол түмүгэ 15 мүн. тута биллэр».

Биирдии биирдии дьон кэлитэлээн анаалыс туттарар. Бэлиэтээн эттэххэ, В уонна С гепатит хроническай ыарыы быһыытынан сайдаллар уонна быар рагын, цирроһун сүрүн төрүөтүнэн буолаллар. Өрөспүүбүлүкэ үрдүнэн уон туөрт тыһыынчаттан киһи учуокка турар.

Айна Домотова, СПИД киин профилактикаҕа салаатын сэбиэдиссэйэ: «Нэһилиэнньэҕэ биһи тахсан түргэн тест оҥоробут. Ол түмүгүнэн ыалдьыбыт дьоннору булуохпутун сөп. Уонна тутатына эмтиир курдук».

ВИЧ — киһи иммуннай систиэмэтин айгыратар вирус. Бу вирус атын сыстыганнаах ыарыылар сайдалларыгар тириэрдиэн сөп. Онон хас биирдии киһи эрдэтинэ ВИЧ статуһун билэ сылдьара булгуччулаах. Оттон сэллигинэн ыалдьыы көрдөрүүтэ  кэнники сылларга өрөспүүбүлүкэ үрдүнэн  аччаабыта бэлиэтэнэр.

Марианна Старостина, Дьокуускай олохтооҕо: «Маннык аахсыйа нэһилиэнньэҕэ оҥорбуттара олус туһалаах».

Бу нэдиэлэттэн саҕалаан куоракка дьон тоҕуоруһар, сынньанар сирдэригэр гепатит В, С, ВИЧ, сифилис, туберкулез курдук кутталлаах ыарыыларга экспресс-тестирование ыытар.