Дьокуускайга Дьиэ кэргэн, таптал уонна бэриниилээх буолуу күнүн бэлиэтээтилэр

Өрөспүүбүлүкэ болуоссата дьол түһүлгэтигэр кубулуйар. Холобур буолар уһун кэмҥэ бииргэ олорбут ыаллары тэҥэ саҥа дьиэ кэргэн тэриммит дьоннор биир тэҥҥэ эргийэллэр. Ыраас тапталы, өйдөһүүнү, өйөһүүнү түстүүр үҥкүүгэ баҕалаахтар кыттыбыттар. Аҕыйах хонуктааҕыта ыал буолбут Влада уонна Максимильян Решетниковтар  дьиэ кэргэн быһыытынан бастакы тэрээһиннэрэ.

Влада Решетникова: «Биһи Решетниковтар дьиэ кэргэн от ыйын 5 күнүгэр захсаламыппыт. Уонна бүгүн Дьиэ кэргэн күнүгэр аналлаах тэрээһиҥҥэ кэлэн кыттыыны ыллыбыт. Биһиэхэ бу дьиэ кэргэммитигэр бастакы бырааһынньыкпыт буолар».

Бу бэлиэ күн көлүөнэлэри сомоҕолуур үтүө үгэс. ыччат дьон иннигэр 50 сыл бииргэ олорбут  ыаллар "Дьиэ кэргэн килбиэнэ" бэлиэни туттулар. Кинилэр өр сылларга харыстаан кэлбит истиҥ сыһыаннарынан, бэриниилээх буолуу, ытыктабыл, таптал дьиҥнээх холобурдара буолаллар. 

Людмила Неустроева, "Дьиэ кэргэн килбиэнэ" бэлиэ хаһаайыттара: «1972 сыллаахха билсибиппит, онтон ыла наар бииргэ сылдьабыт. Икки оҕолоохпут, сиэннэрдээхпит уонна ииппит оҕолорбут элбэхтэр. Онтуктарбыт эмиэ улахан дьоннор, манна бааллар, оҕолоохтор».

Бигэ туруктаах ыал - норуот кэскилэ.  Саха сирэ оҕо төрөөһүнүн көрдөрүүтүнэн дойдуга биир инники сылдьар регионнарга киирсэр. Холобур, ааспыт сылга уон тыһыынчаттан тахса кырачаан күн сирин көрбүтэ. Онон биһиги өрөспүүбүлүкэбит Уһук Илиҥҥэ элбээн иһэр нэһилиэнньэлээх соҕотох регион буолар. Саха сиригэр хас бэһис ыал элбэх оҕолоох.

Юлия Ноговицына, СӨ гражданскай турук аахталарын сүрүннүүр салалта  сүрүн салаатын салайааччы: «Саха Өрөспүүбүлүкэтэ Арассыыйа атын регионнарын кытта тэҥнээн көрөр буоллахха оҕо төрөөһүнүгэр үрдүк көрдөрүүлээх. Ол курдук, оҕо төрөөһүнэ көрдөрүүтэ түспэт. Сүрүн төрүөтэ дьиэ кэргэни өйөөһүн уонна элбэх оҕолоохторго араас дьаһаллар үлэлииллэрэ».

Билигин "Дьиэ кэргэн" ийэ хаппытаала 300 солкуобайга тэҥ, оттон бу сылга 3 оҕоҕо эрэ буолбакка, төрдүс, бэһис, онтон кэлэр оҕоҕо эмиэ бэриллэр буолбута. Холобур, оҕо төрөөтөҕүн ахсын, көмө миэрэлэри учуоттаан, уопсай суумманы таһаардахха маннык. 

Дьиэ кэргэн күнэ киин куоракка икки сиринэн киэн далааһыннаахтык барда. Ол курдук өрөспүүбүлүкэ уонна хомсомуол болуоссаттарыгар. Манна араас дьиэ кэргэҥҥэ сыһыаннаах аралдьытар тэрээһиннэр ыытылыннылар. Бу күнү бэлиэтээһин дьиэ кэргэн сыаннастарын тарҕатар, көлүөнэни сибээстиир, ийэ уонна аҕа орулларын үрдэтэр.