АГАТУ Өктөмнөөҕү салаата  "Айылҕаны чөлүгэр түһэрии" бырайыакка кыттыыны ылар

АГАТУ Өктөмнөөҕү филиалын 1 кууруһун устудьуона Ярослав Никулин агроном идэтин ылаары сайыҥҥы праткикатын бэс маһы үүннэрэр теплицаҕа атаарар. Үлэ ымпыгын номнуо иһиттэн билэр.

Ярослав Никулин, АГАТУ Өктөмнөөҕү филиалын агрономия салаатын 1 кууруһун устудьуона: «Уу кутабыт, буору марганцовкалаах уунан ыраастаабыппыт, онтон сиэмэлэри олордубуппут, ол кэннэ уулата эрэ сылдьыбыппыт. Көҕөрбүттэр, ол аата үчүгэйдик үүнэллэр».

2-ис сылын Өктөмнөөҕү филиал "Айылҕаны чөлүгэр түһэрии" университет улахан бырайыагар кыттар. Былырыын ол чэрчитинэн улахан теплица тутуллубута. Бастакы хардыылар буолан, ааспыт сылга үүнээйилэр сорохторо улааппатах түгэннэрэ бааллара.

Агафья Платонова, АГАТУ Өктөмнөөҕү филиалын кылаабынай научнай үлэһитэ, тыа хаһаайыстыбатын наукатын хандьыдаата: «Быйыл олордуубут үчүгэй. 6 вентилятордаахпыт, теплица температурата үчүгэй. Күн аайы кэтии сылдьабыт».

Былырыҥҥыны учуоттаан, эбии вентилятордары туруоран, үчүгэй уоҕурдуу кутан билигин мас оҕолоро үүнэ-силигилии тураллар.

Бу бырыйыак күһүн түмүктэнэн, Горнай улууһун хара тыата ойуур баһаарын кэнниттэн чөлүгэр түһэриитигэр төһүү буолуоҕа.

Тустаах филиал өссө Агротропа диэн бырайыактаах. Ол эбэтэр учаастакка араас үүнээйилэри олордоллор. Маныаха манна устудьуоннар уонна аспираннар кэлэн уопуттарын, чинчийиилэрин оҥороллор. Холобура, манна уоҕурдууну үөрэтэллэр.

Анна Алексеева, АГАТУ Өктөмнөөҕү филиалын аспираана: «Сидеральнай уоҕурдуу туһанар уопут оҥоро сылдьабыт. Хайдах бааһынаҕа дьайарын көрүөхтээхпит».

Агротропа бырайыак маныаха туристары угуйуо. Кэлбит ыалдьыттар араас үүнээйилэри көрөллөрүн таһынан, илии тутуурдаах дьиэлэхтэрэ. Бу курдук, АГАТУ Өктөмнөөҕү филиалыгар суолталаах бырайыактар олоххо киирэ тураллар.