Дьокуускайга клещка ытыттарбыт дьон ахсаана элбиир

Роспотребнадзор Саха сиринээҕи салалататын лабораториятыгар сезон саҕаланыаҕыттан, ыам ыйыттан,  үлэ үгэнэ. Нэдиэлэ ахсын лабораторияҕа  үөннэри аҕалаллар. Бүгүҥҥү күҥҥэ номнуо 400-чэкэ клеһи чинчийбиттэриттэн, уонча бырыһыана сүлүһүннээҕэ билиннэ. Бастаан лабораторияҕа кэлбит сүлүһүннээх хомурдуос көрүҥүн быһаараллар. Ол кэннэ пцр уонна ифа анализ көрүҥүнэн туох эмэ ыарыыны илдьэ сылдьарын чинчийэллэр. Өрөспүүбүлүкэ үрдүнэн уопсайа 533 түбэлтэ таҕыста. 

Валентина Григорьева, Роспотребнадзор Саха сиринээҕи салалтатын эпидемиологическай санитарнай кэтээн көрүү салаатын салайааччытын солбуйааччы: "Саамай элбэх ытыттарыы Ленскэй оройуонугар тахсар, сыл аайы маннык буолар. Бу күннэргэ 260 түбэлтэ. Ону тэҥэ Нерюнгрига 77, Алдаҥҥа 89, Өлүөхүмэҕэ 37 уонна Дьокуускай куоракка 37. Онтон атын улуустарга биирдиилээн түбэлтэлэр бааллар".

Урукку сылларга клещ дьону ыстааһына сүрүннээн соҕуруу улуустарга үгүстүк бэлиэтэнэр эбит буоллаҕына, бу аҕыйах сылтан бэттэх киин куоракка эмиэ тахсар буолла. Дьокуускайга клещка ытыттарбыт дьон ахсаана элбээтэ. Ыам ыйыттан саҕалаан манна 37 түбэлтэ бэлиэтэннэ, бу ааспыт сылы кытта тэҥнээтэххэ балтараа төгүл элбэх көдөрүү, былырыын баччаларга 22 түбэлтэ этэ. Чуолаан Жатай, Хатыҥ Үрэх, Бүлүүлүүр, Покровскайдыыр суол сиригэр клещ баара биллэр.

Клещ энцефалит уонна боррелиоз диэн ыарахан инфекционнай ыарыылары тарҕатар кутталлаах. Клещевой энцефалит диэн ньиэрбэ систиэмэтин уонна мэйии үлэтин кэһэр вируснай ыарыы буолар, кини паралич онтон да атын уустук ыарыыларга тиэрдиэн сөп. Саамай табыгастаах харыстаныынан быһыы ылааһына буолар. Маныаха вакцинаны иммунитет үөскүүрүгэр саас-күһүн ылар табыгастаах. Ыам уонна бэс ыйдарга клещкэ ытыттарыы саамай элбэхтик бэлиэтэнэр кэмэ.

"Клещ окко саһа сытан киһи этигэр, таҥаһыгар хатанар адьынаттаах. Ыам ыйыгар куорат бу сынньалаҥ паркатын территориятын бүтүннүү эмтээн тураллар. Исписэлиистэр хас биирдии мас төрдүн, от быыһын туһааннаах сурадаһынынан кичэйэн ыстарбыттара. Онон билигин паркаҕа сылдьарга, сынньанарга куттал суох", - Татьяна Николаева, корреспондент.  

Оттон ойуурга сылдьарга сэрэхтээх, хайаан да  үөнтэн-көйүүртэн харыстыыр сабыылаах сырдык, таҥастаах сылдьар ордук.