Дойду үрдүнэн Авиалесоохрана күнэ бэлиэтэнэр

"Авиалесоохрана" Саха сиринээҕи диспетчерскэй сулууспатыгар суукканы эргиччи үлэ тохтообот.  Бу дьоҕус хоско өрөспүүбүлүкэҕэ ойуур баһаардарын балаһыанньата барыта түмүллэр. Ол курдук космостан кэтээн көрүү, авиа уонна видео кэтээһин.

"Уот туруута бэлиэтэммэтэ" диэн иһитиннэрии быйыл бүтэһик сыллардааҕар элбэхтэ иһиллэр. Салгынынан кэтээн көрүү Уус Алдан улууһугар субу бириэмэҕэ көтө сылдьар. Итиэннэ үлэ хаамыыта барыта рациянан манна быһа биллэриллэ турар.

Ойуур баһаарын олох кыра эрдэҕинэ көрөн умулуннарар саамай көдьүүстээх ньыма. Онон авиа кэтээһин биир күн тохтоло суох  ыытыллар.

Алексей Бочкарев, СӨ ойуур хаһаайыстыбатын регионнааҕы диспетчерскэй сулууспатын диспетчерэ: "Билигин Анаабырга икки сиргэ уот туруута бэлиэтэннэ. Нэһилиэнньэлээх пуунтан олох ыраах, онон кутталы үөскэппэт. Быйыл турукпут быдан үчүгэй, атын дьыллардааҕар. Онон бары үөрэбит".

Дьокуускайдааҕы "Авиалесоохрана" салаата түөрт улууһу тэҥэ Дьокуускай куорат күөх тыатыгар эппиэттээх. Ол курдук Мэҥэ Хаҥалас, Уус Алдан, Нам уонна Дьокуускай. Күннэтэ Маҕан пуордуттан бу ыйыллыбыт улуустарга көтүү оҥороллор. Быйыл штат эбиллэн уопсайа барыта 74 десантник баһаарынай итиэннэ кэтээччи лүөччүк үлэлиир.

Евгений Соргоев, "Авиалесоохрана" Дьокуускайдааҕы салаатын лүөччүгэ: "Күн аайы 5 чаас көтөбүт, АН-2 сөмөлүөтүнэн парашютистардаах. Баһаар суох да буоллаҕына көтөбүт, син биир территориябытын син биир көрөбүт. Биһиги үлэбит диэн, үөһэттэн кэтээн көрүү, баһаар көрдүүбүт. Баһаар буллахпытына парашютистарбытын түһэртиибит, уот баар сиригэр дьону таһабыт, умуруорабыт ".

Уоту кытта охсуһуу курдук уустук үлэҕэ идэлэригэр дьиҥ бэриниилээх дьон эрэ кыайар үлэтэ. Кинилэр кэмигэр кэтээн көрөөһүннэринэн, сөптөөх быһаарыныыларынан, хорсун быһыыларынан сыллата мөлүөйүөнүнэн гектар сир быыһанар, саамай сүрүнэ нэһилиэнньэлээх пууннары уоттан харыстаналлар.

Владимир Осипов, "Авиалесоохрана" Дьокуускайдааҕы салаатын баһаарынай-десантнай сулууспатын инструктора: "Уот турбут сирдэрин көрөн биүиэхэ этэллэр. Биһиги чаас иһигэр хомунабыт уонна былаһааккаттан лүөччүктэр тыаҕа тириэрдэллэр".

Оттон быйыл Саха сиригэр ойуур баһаарын умуруорууга үбүлээһин миллиартан тахса кэриҥэ улаатта. Ол курдук  федеральнай бюдеттан 2.7 миллиард тыырылынна. Маныаха икки авиасалаа тэрилиннэ.