Устудьуоннара ойууру чөлүгэр түһэриигэ анаан бэрдьигэс үүннэрэллэр

АГАТУ Өктөмнөөҕү филиалын 1 кууруһун устудьуона Ярослав Никулин агроном идэтин ылаары сайыҥҥы быраактыкатын бэс маһы үүннэрэр тэпилииссэҕэ атаарар. Үлэ ымпыгын-чымпыгын номнуо иһиттэн билэр.

Ярослав Никулин, АГАТУ Өктөмнөөҕү филиалын агрономия салаатын 1 кууруһун устудьуона: "Бастаан буорун оҥорбуппут. Ол буорбутун  марганцовкалаах уунан ыраастаабыппын. Онтон сиэмэ олордубуппут. Ол кэннэ уу эрэ кута сылдьабыт. Үүнүүлэрэ үчүчгэй, көҕөрбүттэр. Ол аата буордарын сөбүлээбиттэр".

Иккис сылын Өктөмнөөҕү филиал "Айылҕаны чөлүгэр түһэрии" университет улахан бырайыагар кыттар. Былырыын ол чэрчитинэн улахан тэпилииссэ тутуллубута. Бастакы хардыылар буолан, ааспыт сылга үүнээйилэр сорохторо улааппатах түгэннэрэ бааллара.

Агафья Платонова, АГАТУ Өктөмнөөҕү филиалын кылаабынай научнай үлэһитэ, тыа хаһаайыстыбатын наукатын хандьыдаата: "Быйыл былырыыҥҥытааҕар олордуубут үчүгэй. Тоҕо диэтэр былырыын хойутаан ыспыппыт уонна техническэй хааччыллыы өттүнэн кыратык кыаллыбатаҕа. Оттон быйыл 5-6 вентилятордаахпыт. Тэпилииссэбит температурата үчүгэй,  салгын оонньуур”.

Былырыҥҥыны учуоттаан, эбии вентилятордары туруоран, үчүгэй уоҕурдуу кутан, билигин мас оҕолоро үүнэ-силигилии тураллар.

"Билиҥҥи туругунан тэпилииссэҕэ барыта 100 тахса тыһыынча бэс мас үүнэр. Уһуннара 4-5 сантымыатыр", - Анастасия Добрянцева.

Бу бырыйыак күһүн түмүктэнэн, Горнай улууһун хара тыата ойуур баһаарын кэнниттэн чөлүгэр түһэриитигэр төһүү буолуоҕа.

Тустаах филиал өссө "Агротропа" диэн бырайыактаах. Ол эбэтэр учаастакка араас үүнээйилэри олордоллор.Маныаха устудьуоннар уонна аспираннар кэлэн уопуттарын, чинчийиилэрин оҥороллор. Холобур, манна уоҕурдууну үөрэтэллэр.

Анна Алексеева, АГАТУ Өктөмнөөҕү филиалын аспираана: "Органическай уоҕурдуу оннугар седеральнай уоҕурдууну туһанаарыбыт уопут оҥоро сылдьабыт. Онно биһиги үүнүүгэ хайдах дьайарын кэтээн көрөбүт".

Агротропа бырайыак  туристары угуйуо. Кэлбит ыалдьыттар араас үүнээйилэри көрөллөрүн таһынан, илии тутуурдаах дьиэлэхтэрэ. Бу курдук, АГАТУ Өктөмнөөҕү филиалыгар суолталаах бырайыактар олоххо киирэ тураллар.