Дьокуускай сөтүөлүүр сиригэр бастакы көмөнү оҥорууга маастар-кылаас буолла

Дьокуускайдааҕы медицинэ киинин суһал салаатын старшай фельдшера Андриян Колесов ууга түспүт киһиэхэ бастакы көмөнү оҥорууга маастар-кылаас көрдөрөр. Андриян фельдшерынан үлэлээбитэ 4 сыла. Ыксаллаах балаһыанньа тириир түгэнигэр хас биирдии киһи бастакы көмөнү оҥорор үөрүйэҕи хайаан да сатыахтааҕын этэр.

Андриян Колесов, Дьокуускайдааҕы медицинэ киинин суһал салаатын старшай фельдшера: "Араас түгэн буолуон сөп, ордук сайыҥҥы кэмҥэ. Куруутун аттыгар медик баар буолбат, онон хас биирдии киһи бастакы көмөнү оҥоро үөрэниэхтээх ". 

Куорат пляһыгар экологическай бырааһынньыкка анаан медицинэ үлэһиттэрин ассоциацията дьоҥҥо-сэргэҕэ анаан бастакы көмөнү оҥорууга үөрэх ыытар. Сайыҥҥы кэмҥэ билигин ууттан сэрэхтээх буолуу хайаан да ирдэнэр. Владислав Васильев Хотугулуу-Илиҥҥи федеральнай университет физкультурнай институтун 2 кууруһун устудуьона. Куорат пляһыгар быыһааччы быһыытынан быраактыкатын бара сылдьар.

Владислав Васильев, ХИФУ устудьуона: "Үксүн оҕолору көрүөхтээхпит, кыра оҕолору киллэрбэппит. Кинилэр төрөппүттэрин эрэ кытта сылдьыахтаахтар. Манна чөл олоҕу тутуһар сир, онон аһыы утаҕы иһээччилэри күүскэ хонтуруоллуубут". 

Сыллата ууга суорума суолланар киһи ахсаана аҕыйаабат. Быйыл сезон саҕаланыаҕыттан 16 киһи ууга былдьанна. Маныаха куорат сөтүөлүүр сирэ саҥардыллан, өрөмүөннэнэн куттала суох буолууну хааччыйыыга улахан болҕомтону уураллар.

Виктор Обутов, Дьокуускай техническэй хааччыллыытыгар сулууспатын дириэктэрэ: "Бастатан туран, куттала суох буолууну хааччыйыы. Онно уу, кытыл аналиһын туттаран, дьоҥҥо туох да куттала суох диэн анализ оҥотторон бэлэмниибит. Анал бэлэми ааспыт быһааччылары туоруорабыт".

Төрөппүттэр оҕолорун ууга көрүүтэ-истиитэ суох ыыталлара булгуччу бобуллар. Сөтүөҕэ анамматах, көҥүллэмэтэх түбэһиэх сирдэргэ киирии, итирдэр утаҕы иһэн баран сөтүөлээһин, ууга сылдьыы быраабылаларын кэһии алдьархай сүрүн төрүөттэринэн буолалларын умумаҥ.