Дьиэ тутар кэмбинээт быйыл 6 дьиэ матырыйаалын оҥоруо

Таас дьиэ биир кэлим истиэнэтин оҥорон таһаарыы үгэнэ. Тустаах оборуудабанньаҕа сиэмэн мэһиллэн тахсан маннык киэпкэ кутуллар. Эрдэ барыта илии үлэтэ эбит буоллаҕына, ааспыт сылтан собуот саҥардыллан, бу үлэ автоматизированнай буолла. Сиэмэн кутуллубутун кэннэ убаҕаһы формовщиктар лаппаакынан тэҥнээн, көннөрөн биэрэллэр. Бу термостенд лиэнтэтигэр бастакы дьиэ комплегын матырыйаала бэлэмнэнэр.

"Бу билигин истиэнэ састаабын киэптэргэ кутуу барар. Оттон киэпкэ кутуу, арматураны оҥоруу, куурдуу, панеллары оҥорон таһаарыы барыта суукка кэриҥэ бириэмэни ылар. Хас биирдии түһүмэххэ хаачыстыбаны хонтуруоллааһын күүскэ тэриллэр", - Татьяна Николаева

Быйылгы сылга 6 дьиэ комплегын бэлэмнээн таһаарар сорук турар. Бүгүҥҥү күҥҥэ бастакы дьиэ билиитэлэрин 30% оҥордулар, онон үлэ күөстүү оргуйар. Тутуу кытаанах үлэтигэр кэрэ аҥаардар эмиэ бааллар. Марника Сафронова үрдүк үөрэхтээх инженер-технолог. ДСК собуотугар үлэлээбитэ 4 ыйтан орто. Кини саҥа кутуллубут матырыйаал хаачыстыбатын бэрэбиэркэлиир, оҥоруу түһүмэҕин кэтээн көрөр.

Марника Сафронова, оҥорон таһаарыы маастара: "Бетон куталлар ол кэннэ илибирэтэн тэҥнииллэр. Ол кэннэ туора барыан хаалын сөп, мин ону бэрэбиэркэлиибин". 

Бетон бородууксуйатын хаачыстыбатын кутуллар кэмиттэн саҕалаан бэрэбиэркэлииллэр. Бу курдук собуот толору кыаҕынан үлэлии турар. Сүүсчэкэ кэриҥэ киһи күннэтэ үлэлиир-хамсыыр. Сууккаҕа 60 истиэнэни, билиитэни оҥорон таһаараллар. Хас биирдии түһүмэх үлэтэ чопчу ирдэбиллээх, дьүөрэлии ыытыллар.

Кутуу үлэтин тэҥэ, ыаллыы сыахха арматураны таҥаллар. Хас биирдии тимири сыбааркалаан конвейер быһыытынан бэлэмнииллэр. Манна билигин илии үлэтэ эбит буоллаҕына, сотору кэминэн автоматизированнай режимҥэ көһүөхтэрэ, оччотугар үлэ тэтимирэн биэриэҕэ.

Андрей Сторожев, тэрилтэ кылаабынай технолога: "Инниктин панелларбытыгар саҥа сүүрээни киллэриэхтээхпит. Онуоха арматурабыт кэлэн турар. Онон бу күннэргэ кутан саҕалыахпыт". 

Оҥоһуллан тахсыбыт тутуу матырыйаалларын куоракка “Звезднай","Спортивнай" түөлбэлэр дьиэлэрин таҥыыга, итиэннэ атын тутуу былаһааккаларыгар туһаныахтара.