Бастыҥ суруналыыстар судаарыстыбаннай наҕараадалары туттулар

Күн бэҕэһээ Саха сирин үрдүнэн национальнай бэчээт күнүн биир идэлээхтэрбит бэлиэтээтилэр. Бастыҥнар билинниллэр, саамай үлэһиттэр үлэлэрин түмүгэ сыаналанна.

Күлүмнүүр аатынан судаарыстыбаннай бириэмийэни Саха араадьыйатын дириэктэрэ, байыаннай корреспондент Николай Бястинов тутта. Кини суруналыыстыка эйгэтигэр үлэлээбитэ 10-тан тахса сыл буолла. Бу наҕараада күүстээх хамаанда үлэтин түмүгэ диэн бэлиэтиир.

Николай Бястинов, Саха араадьыйатын дириэктэрэ: "Сахабыт тыла сайдарыгар сахалыы тыллаах бэчээт, араадьыйа, тэлэбиидэнньэ баарын туһугар туруулаһан үлэлиибит. Ити сүрдээх улахан үлэ. Кыра хамнастаах, ол эрэн сүрдээх ирдэбиллээх. Үйэтин аныыр киһи аҕыйах. Маннык наҕараада биэрэллэрэ олус эппиэтинэстээх уонна үлэҕэ кынаттыыр".

Олоҕун бэчээккэ анаабыт, сытыы бөрүөлээх Чурапчы литературнай түмсүүтүн салайааччыта Римма Корякина - Амма Аччыгыйын аатынан Ил Дархан бириэмийэтин тутта.

Римма Корякина – Хотууна, Амма Аччыгыйын аатынан Ил Дархан бириэмийэтин хаһаайына: "Саха өрөспүүбүлүкэтин бастыҥ наҕараадатын туттум. Ити миэхэ хайдах да түүлбэр да киирбэт этэ. Наһаа үрдүк үөрүүлээх, долгутуулаах уонна эппиэтинэстээх. Оҕо литературатыгар суруйабын. Барыта 8 кинигэлээхпин. Манна Саха сирин кыылларын туһунан кинигэм сыаналанна".

Өрөспүүбүлүкэ биир бастыҥ кырдьаҕас хаһыата дириҥ историялаах, элбэх ааҕааччылаах, "Саха сирэ" хаһыат бу бэлиэ күн элбэх наҕарааданы тутта. Хаһыат нэдиэлэҕэ биирдэ тахсар, маны таһынан икки сайты үлэлэтэ олорор. Сайты ыйга 1 мөлүйүөнтэн тахса киһи көрөр.

Анивера Акимова, "Саха сирэ" хаһыат кылаабынай эрэдээктэрин солбуйааччыта: "Биһиги сайпыт күнүстэри-түүннэри биир күн өрөбүлэ суох сонуннары тарҕата, суруйа олоробут. Күн бүгүн биһиги хаһыаттыын холбоон 7 эрэ корреспонденнаахпыт ".

Өрөспүүбүлүкэҕэ күн бүгүн 202 көрдөрөр-иһитиннэрэр эйгэ үлэлиир. Суруналыыстар төрүт тыллары харыстыыр, бэчээтин сайыннарар сыаллаах үлэлии олороллор.