Үбүлүөйдээх Дыгын оонньуулара түмүктэннилэр

Сабыс саҥа УАЗ "Патриот" массыына хаһаайына Борис Сдвижков. Быйылгы үбүлүөйдээх Дыгын оонньууларыгар муҥутуур кыайыылааҕынан Амма улууһун бөҕөһө буолла.  Борис Сдвижков бары көрүҥнэ бэйэтин дьоҕурун, кыаҕын көрдөрдө. Бастакы күнтэн сэмэй, холку майгытынан, элбэх киһи сүрэҕин сүүйдэ.

Кини оскуолаттан быһа Дыгын оонньууларын кыайыылааҕа буолар ыра оҥостубут баҕа санаам туолла диэн этэр. Бүтэһик түһүмэххэ таас көтөҕүүтүгэр, көрөөччүлэр улахан күүс-көмө буоллулар, иккис тыын биэрдилэр диэн этэр.

Борис Сдвижков, "Дыгын оонньуулара - 2025" күрэхтэһии кыайыылааҕа: «Дьон кырдьык сэниэ биэрэр эбит. Сэниэм бүтэн хаалбыта тааска. Бүттүм дии санаабытым, онно хаһыытаабыттарыгар бу бачча кэлэн баран кыайан иһэммин мүлчү тутан кэбиһиэхпиний диэммин, туох баарбынан, дьон көмөтүнэн иккис тыын кэллэ».

Бу күрэххэ уолаттар сылы сылынан бэлэмнэнэллэр, дьаныардаахтык дьарыктаналлар, хас да түһүмэҕи ааһаллар. Быйыл барыта 16 бөҕөс, сэттэ көрүҥҥэ күөн көрүстэ. Хас биирди кыттааччы бэйэтэ туспа дьарыктанар ньыымалаах, уратылаах.

Николай Иванов, саха төрүт көрүҥнэригэр Кэбээйи улууһун тренерэ: «Элбэх үлэни үлэлээн киирэллэр. Олохторун барытын биэрэллэр. Оннук эрэ гыннахха манна киирсэр буоллаҕын. Хас биирдии киирсэр уол дьоруой».

Өрөспүүбүлүкэ олохтоохторо долгуйа күүтэр саха төрүт оонньууларыгар Үс Хатыҥҥа түһүлгэ толору, дьон-сэргэ күн-дьыл туругун аахсыбакка көрө кэлбиттэр. Маны таһынан быһа эпииринэн эмиэ элбэх киһи көрөр, ханна да баар буоллар көтүппэт, саха боотурдарыгар ыалдьаллар.

Күрэхтэһии иккис күнэ саамай эрийсиилээх киирсиилэр буоллулар. Уолаттар ох саа көрүҥүгэр тыалы да мэһэйдэппэттэр. Бу кинилэр кыахтаахтарын,  бэлэмнээхтэрин өссө биирдэ көрдөрөр.

Иннокентий Макаров, "Дыгын оонньуулара - 1995" күрэхтэһии кыайыылааҕа: «Дьылҕа хаан дьону түҥ-таҥ тутаталыыр. Күүрээннээх күрэхтэһиилэргэ хайдах дьарыктаммыттара, уйулҕа өттүнэн ким төһө бэлэмнээҕэ, ол кыайар».

Саха төрүт көрүҥнэрин сайыннарар күрэх быйыл 30 сыла, онон тэрийээччилэр улахан бириистэри бэлэмнээбиттэр.  Оонньуулары үрдүк таһымнаахтык ыытарга кыһаллыбыттар.

Евгений Григорьев, Дьокуускай куорат баһылыга: «Ити уолаттар хамаандаларыгар улахан көҕүлүүр күүс буолар. Сылтан сыл аайы баҕа санаабытынан бу көрүҥмүтүн сайыннаран биэриэхпитин наада».

Быйылгы оонньууларга элбэх саҥа аат таҕыста. Ньурба улууһуттан кыттар Валентин Афанасьев Дыгын оонньууларыгар бэлэмнэммитэ 1,5 сыл буолбут. Төһө да баастакы күрэхтэһии буоллар көрдөрүүм үчүгэй диэн этэр.

Валентин Афанасьев, "Дыгын оонньуулара - 2025" күрэхтэһии кыттыылааҕа: «Ааспыт сылга сэттис буолбутум сүүмэрдээһиҥҥэ. Сыал сорук туруорунан кэлбитим, үчүгэйдик кииристим диэххэ сөп».

Дыгын оонньуулара сылын аайы таһыма үрдүү турар. Бу оонньууларга кыттыан баҕалаах ыччат, саха боотурдара сылын аайы элбии тураллар.

Айсен Николаев, СӨ Ил Дархана: «Спорт эрэ буолбакка, чөл олоххо улахан пропаганда. Ол иһин биһи саха дьоно маны сөбүлүүбүт. Элбэх киһини мунньар, дьону сомоҕолуур, Туймаада ыһыаҕын киэргэлэ буолар».

Быйылгы оонньуулар үрдүк таһымнаахтык, уратытык уонна улахан эчэйиитэ суох аастылар. Аны эһиилги "Дыгын оонньууларыгар" эмиэ саҥаттан саҥа ааттар кэлэллэрэ күүтүллэр.