Орто үөрэххэ туттарсыыга абитуриент хааччаҕа суох хас баҕарар үөрэххэ сайаапка ыытар кыахтанна

Дьокуускайдааҕы тыа хаһаайыстыбатын техникумун тутар хамыыһыйата күннэтэ аана аһаҕас. Манна тыа хаһаайыстыбатын салаатынан араас идэлэргэ туттарсыан  баҕалаах кэлэн докумуонун бэйэтэ биэриэн, биитэр туһааннаах порталынан, почтанан ыытыан сөп. Матрена Ноговицына, бэйэтэ техникум лаборана, преподавателэ, үөрэх кыһатын тутар хамыыһыйатыгар үлэлии сылдьар.

Матрена Ноговицына, тыа хаһаайыстыбатын техникумун преподавателэ: "Бэс ыйын 20 күнүттэн үлэлии олоробут. Онтон ыла 70 сайаапка киирдэ. 9 кылаас кэнниттэн оҕолор улахан аҥаардара землеустроитель идэтигэр биэрэллэр. Онно уопсайа 20-чэ сайаапка киирдэ. Оскуола оҕолоро 9 кылаас кэнниттэн кэлэ сатыыллар эбит биллибит. Сайаапка улахан аҥаара 9 кэнниттэн". 

Манна 9 кылаас кэннэ уу ресурсаларын исписэлииһэ, зоотехник, технолог, охотовед, кыылы иитии, сүөһү көрүүтүнн маастара курдук идэлэргэ үөрэнэ киириэххэ сөп. Онтон 11 кылаас кэннэ агроном, ветеринар, землеустроитель, тыа хаһаайыстыбатын тиэхиньикэтин, оборуудабанньатын, ойуур хаһаайыстыбатын  исписэлииһэ идэлэри баһылыыр кыах баар. Сиһилии информацияны техникум сайтыттан киирэн билсиэххэ сеп.

Вера Дьячковская, тыа хаһаайыстыбатын техникумун тутар хамыыһыйатын эппиэттээх сэкэрэтээрэ: "Быйылгы 2025-2026 үөрэх дьылыгар 300 бүддьүөт миэстэтигэр ылаары бэлэммит. Ону таһынан төлөбүрдээххэ ылыахпыт".  

Саха сирин үрдүнэн уопсайа 42 орто үөрэх кыһата устудьуоннарын күүтэр. Быйыл барыта 7 тыһыынча кэриҥэ бюджет миэстэтэ көрүлүннэ. Ол иһигэр 9 кылаас кэннэ 4 тыһыынчаттан тахса миэстэ, уонна 11 кылаас кэннэ 2700 тахса миэстэ баар. Быйыл орто үөрэхтэргэ саҥа идэлэр аһылыннылар. Ол курдук сүрүннэн саҥа технологияларга анаммыт идэлэр баар буоллулар. Холобур,  сибээс коллеһыгар пилота суох көтөр ааллары салайыы, Покровскайдааҕы Айтын коллежка компьютернай оонньуулары таҥыы, ону тэҥэ Намҥа уонна Дьокуускайдааҕы коммунальнай техникумҥа тутуу салаатыгар информационнай технологияны туһаныы идэлэрэ киирдилэр.

 Лилия Иванова - СӨ профессиональнай үөрэхтээһин

институтун дириэктэрэ: "Билигин урукку курдук аттестат орто баалынан үөрэххэ киирэллэр. Быйыл абитурент хас баҕар үөрэх кыһатыгар хайа баҕар хайысхаҕа хааччаҕа смуох докумуон биэрэр бырааптаах".  

Докумуоннары атырдьах ыйын 15 күнүгэр диэри тутуохтара. Онтон бүддьүөт миэстэтэ ордор түгэнигэр сэтинньи ыйга диэри докумуон тутуутун уһатыахтара. Үөрэххэ туттарсааччылар 122 биир кэлим кол- кииҥҥэ  эбии 9 нүөмэри баттаан туттарсыыга ыйытыыларга иписэлиистэртэн хоруй ылыахтарын сөп.