Дьокуускайга дуобакка Ил Дархан кубога ыытылла турар

Саха сиригэр дуобакка Ил Дархан Кубога. Турнир быйыл үһүс төгүлүн ыытыллар. Мындыр өйү, түргэн толкуйу ирдиир көрүҥҥэ барыта 200-тэн тахса киһи кыттыыны ылар.

Хаҥалас улууһуттан төрүттээх Айсен Егоров саахамытанан дьарыктаммыта онус сыла. Кини спорт маастарын нуорматын толорбута ыраатта. Дуобат, саахымат киһи өйүн сайыннарар, тулуурдаах, дьулуурдаах буоларга үөрэтэр диэн этэр.

Айсен Егоров, кыттааччы: «Күрэхтэһии олус күүстээх, аан дойдуттан спортсменнар кэлбиттэр. Олоххо көмөлөһор, тугу эмит гыныаҥ иннинэ толкуйдуурга үөрэтэр».

Ил Дархан кубогар аҕыс дойдуттан уонна Арассыйа сэттэ регионуттан спортсменнар кэллилэр. Кинилэр истэригэр биллэр гроссмейстердар, Аан дойду таһымнаах чемпионнар күрэхтэһэ кэлбиттэр.

Фархад Арсланов, кыттааччы: «В первый раз, ощущения очень хорошие, очень гостеприимные. Турнир проходит на высшем уровне. Хочется сказать спасибо организаторам, что пригласили на этот турнир. Пусть побеждает сильнейший».

Быйылгы күрэхтэһии кыттааччыта элбэх. Бу турнир таһыма үрдүгүн бэлиэтиир. Уопсай бириис пуондата мөлүйүөн икки сүүс.

Владимир Иванов, күрэх кылаабынай судьуйата: «Бастакы миэстэ мэтээлэ алмаастаах уонна үрүҥ көмүс короналаах. 8 миэстэ бириистээх. Бастакы миэстэҕэ 300 тыһ. Иккис миэстэ 200 тыһ.».

Бу көрүҥ Саха сиригэр кэлиҥҥи кэмнэ сайдан иһэр. Ол курдук утумнаан дьарыктанааччылар сылтан сыл аайы элбээн иһэллэр, маны таһынан ордук сөбүлээн оҕолор эмиэ дьарыктанар буоллулар диэн тэрийээччилэр этэллэр.

Леонид Спиридонов, СӨ спорт уонна физическэй култуура миниистирэ: «Эдэрдэр, оҕолор элбэхтэр. Дуобаппыт сайдан иһэр уонна инникилээҕин көрдөрөр. Ыалдьыттарбытыгар махтанабыт».

Бүгүн күрэхтэһии үһүс күнэ. Түмүгү таһааран, кыайыылаахтары чиэстиэхтэрэ.