Дьокуускай куоракка бу күннэргэ ардахтар сабаҕаланаллар

Быйылгы сайын бастакы ыйа бүтэн эрэр эрээри биир үксүн тымныы, ардахтаах күннэр тураллар. Бэл бу ыйга иккитэ тоҥорон, хаһыҥнаан турар.

Татьяна Николаева: Бу күннэргэ Дьокуускайга уонна кэккэ улуустарга күүстээхтик ардыыр, сорох өттүгэр өссө этиҥнээх. Киин куоракка нэдиэлэ эрэбиллээх итии күнтэн саҕаланан баран быыстала суох ардахтаах күннэринэн солбулунна. онтон сылтаан куорат уулуссалара уунан туоллулар.

Дириҥ чалбахтар массыыналар айанныылларыгар,  сатыы дьон сылдьарыгар  харгыһы үөскэттилэр. Бу эргин этиҥнээх ардахтар эбит буоллаҕына, Өлүөхүмэ Кыыллааҕар күүстээх тыал түһэн, улахан хоромньуну аҕала сырытта.

Роман Десяткин үйэтин тухары Саха сирин тыйыс айылҕатын үөрэтиинэн ылсан дьарыктанар. Биологическай наука доктора Аан дойду үрдүнэн климат уларыйыыта бу кэнники сылларга Саха сиригэр дьайыыта бэрт күүһүрдэ диэн этэр.

Роман Десяткин, ирбэт тоҥноох зона биологическэй кыһалҕаларын үөрэтэр Институт кылаабынай научнай сотруднига: «Килиимэппит сылыйан саас, сайын кэлиитэ эрдэлээтэ. Арктикабыт кыһыҥҥы саппааһын түһэриитэ күүһүрэн, биһиэхэ тыал, ардах буолан кэллэ».

Күн-дьыл туругуттан от үүнүүтэ, сир аһа, хортуоппуй быйылгы хайдах буолуой диэн үгүс дьону долгутар. Тыа хаһаайыстыбаттыгар күн-дьыл туругуттан үлэ быһаччы тутулуктанар.

Артём Александров, СӨ тыа хаһаайыстыбатын миниистирэ: «От ыйыттан сылыйан от тэбэн от кэмигэр үчүгэй күннэр тураллар дии саныыбыт. Быйылгы кыстыкка этэҥҥэ киириэхпит диэн баҕа санаалаахпыт. Халлаан хайдах көрдөрөрүнэн буоллаҕа».

Бу маннык тымныйыы аҥардас Саха сиригэр эрэ буолбакка, дойду киин регионнарыгар эмиэ бэлиэтэннэ. Билигин бэс ыйыгар оонноҕор күһүҥҥүлүү тэллэй кытта үүнэн соһутта, Дьокуускай эргин сорох дьон номнуо тэллэйдээн айахтарыгар амсайдылар. ЛАЙФ

Сөҥүүлээх күн-дьыл бү күннэргэ өссө да салҕанара күүтүллэр. Өрөбүллэргэ эмиэ быстах ардыа диэн сабаҕалыыллар.

Саргылаана Никитина, Дьокуускайдааҕы гидрометеосулууспа күнү-дьылы сабаҕалааһын салаатын салайааччыта: «Бэс ыйын 26-27 чыыһылатыгар циклон Өлөөнтөн, Эдьигээн, Батамай, Дьааҥы оройуоннарынан ааһыаҕа. Хоту, арҕаа, киин оройуоннарга ардах сорох сирдэринэн түһэриэ».

Кылам гына ааһар кылгас сайыммытыттан сэмээр элбэҕи кэтэһэр курдукпут: өҥ дьылы, быйаҥы, куйаас күннэри. Барыллаан ааҕыынан мантан сайын кураан күн-дьыл турара сабаҕаланар.