Анал байыаннай дьайыыга сылдьан олохторун толук уурбуттарга наҕараадалары туттарыы тэрээһинэ буолла

Дьааҥы улууһуттан төрүттээх эдэркээн Кэскилээнэ Саввина кэргэнэ анал байыаннай дьайыыга олоҕун толук уурбут. Револий Саввин 2023 сыллаахха хантараагынан сулууспалыы барбыта. Кини анал байыаннай дьайыыга хорсуннук кыттыбытын иһин Орден Мужества судаарстыбыннай наҕараадаҕа тиксэриллиннэ.

Кэскилээнэ Саввина, анал байыаннай дьайыы кыттыылааҕын кэргэнэ: «Бэйэтэ эрдэттэн инник этэ. Бастакы мобилизация буолбутугар. “Тоҕо миигин ыҥырбатылар? Тоҕо повестка кэлбэтэй?” – диир этэ. Уопсайынан патриот этэ».

Анал байыаннай дьайыыга биир дойдулаахтарбыт туора турбакка, бэриниилээхтик кытталлар.  Чурапчы улууһун олохтооҕо Юрий Захаров уола анал байыаннай дьайыы толоонугар охтубут. Юрий Васильевич уолун Орден Мужества наҕараадатын тутта.

Юрий Захаров, анал байыаннай дьайыы кыттыылааҕын аҕата, Чурапчы улууһун олохтооҕо: «Бэйэтэ повар этэ. Алдьархайдаах ас бөҕөнү астаан, балтыларыгар, бырааттарыгар көмөлөһөн. Биир уолум эмиэ армияҕа сылдьар».

Бу күн 12 анал байыаннай дьайыы кыттыылааҕын дьиэ кэргэнэ судаарыстыбыннай наҕараадалары тутта. Ааспыт сылтан Аҕа дойду көсмүкэччилэрин пуонда военкоматы кытта холбоһук маннык тэрээһини ыытар. Аҕа дойду көмүскээччилэрин пуондата үлэлээбитэ 2 сыл буолла. Бу кэм устата тэрилтэ уонунан тыһыынча киһиэхэ тустаах көмөнү тэрийэн оҥордо. Пуонда анал байыаннай дьайыы кыттыылаахтарыгар уонна кинилэр дьиэ кэргэннэригэр көмөлөһөр.

Алексей Александров, Аҕа дойду көмүскээччилэрин фондатын Саха сиринээҕи филиалын салайааччыта: «Биһи уолаттарбыт, Аҕа дойдуну көмүскээччилэр посмертно ылбыт наҕараадаларын военкомат үлэһиттэрэ аймахатрыгар, дьиэ кэргэннэригэр туттараллар. Инники маннык тэрээһиннэр суох этилэр. Дьоннор этиилэрин ылынаммыт маннык холбуу тэрээһиннэри ыытабыт».

Манна пуондаҕа социальнай көмө, үлэнэн хааччыйыы, үөрэххэ туттарсыы, чөлүгэр түһэрии курдук араас хайысхалаах үлэ тэриллэр. Ол курдук сүтүктээх дьиэ кэргэн чилиэннэрэ араас судаарыстыбаттан көмө ылалларыгар, онтон эргиллэн кэлбит байыастар күннээҕи олохторугар толору төннөллөрүгэр тиһигин быспакка күүс-көмө буолар.