Өрөспүүбүлүкэ ойуур баһаардара турар кэмнэриттэн барыта 147 уот турбут түгэнэ бэлиэтэннэ

4 сылын Дьокуускайдааҕы Авиалесоохрана биир тутаах үлэһитэ, парашютист-баһаарынайа Валентин Ушканов ойуур баһаардарын халлаанынан кэтээн көрүүгэ бэлэмнэнэр. Билигин кини оперативнай бөлөҕө хас да улууска балаһыанньа хайдаҕын билэ көтүөхтэрэ.

Валентин Ушканов, "Авиалесоохрана" Дьокуускайдааҕы салаатын парашютист – баһаарынайа: «Илин эҥэр оройуоннарын көрөбүт. 12 чаастан көтө барабыт. Муус устар ыйга элбэх баһаар буолбута».

Бу эйгэ үлэһиттэрэ иһитиннэрэллэринэн быйыл хаһааҥытааҕар да хара тыа умайыытын көрдөрүүтэ намтаабыт. Быйыл уот туруутун кэмэ саҕаланыаҕыттан Өрөспүүбүлүкэ үрдүнэн 147 ойуур баһаара бэлиэтэммит, манна уопсай иэн 54-тэн тахса тыһ гектар. Былырыын баччаларга Саха сиригэр 384 ойуур баһаара турбута. Быйыл үксүн Хоту улуустарга угус уот турбута бэлиэтэнэр.

Борис Кручинин, "Авиалесоохрана" авиационнай салаатын командира: «Хоту Үөһээ Дьааҥы улууһа умайда ахай. Хаардара эрдэ баҕайы ууллубут буолан. Баһаар буолар кутталлаах 3 таһыма буоллаҕына көтөбүт. 4-5 турар буоллаҕына иккитэ көтөбүт».

Тахсыбыт уоту суһаллык умулларарга халлаанынан эрэ буолбакка, камера нөҥүө кэтииллэр. Авиалесоохрана кэтиир-маныыр сулууспата Өрөспүүбүлүкэ улуустарын киин нэһилиэктэрин арылхайдык көрө олороллор.

Чокуур Дуоранов, "Авиалесоохрана" кэтиир -маныыр сулууспатын диспетчерэ: «Видео нөҥүө кэтээһин оройуон кииннэригэр турбуттара. Уопсайа 33 камера турар. 360 гыраадыс тула эргийэр. Бэйэтэ кэтиир эбэтэр бэйэбит киирэн көрөбүт».

Бу курдук видеонан кэтээн көрүү тутатына туох умайа сытарын көрдөрөр. Оттон манна даҕатан эттэххэ, билигин биьиги Өрөспүүбүлүкэбитигэр балыһыанньа кэминэн буоллаҕына, ыаллыы сытар Забайкальскай кыраайыга үрдүкү кылаастаах баһаар буола турар. Онно биһиги байыастарбыт солбуйса сылдьан көмөҕө тиийэллэр.