Тойон-Арыы нэһилиэгэр Эллэй ыһыаҕар чугаһатан сайыны уруйдуохтара

Туһаайыы Тойон-Арыы. Булгунньахтаах нэһилиэгиттэн уу мотуорунан чаас аҥаарыттан ордук кэм айаннаабыт кэннэ дьэ көһүннэ. Тойон-Арыы Өлүөнэ эбэ саамай улахан кээмэйдээх арыытыгар турар нэһилиэк. Манна 100 кыайбат киһи олорор. Бүгүн нэһилиэк бүттүүнэ субуотунньукка тахсар. Онон сарсыардаттан  кэлии-барыы үгүс.

Олохтоохтор аны аҕыйах хонугунан бу кырдалга Үрүҥ Тунах ыһыахха түмсүөхтэрэ. Ол иннинэ чөлүгэр түһэрии, саҥардыы барыта бэйэ күүһүнэн барар. Ким да туора турбат. 

Анна Винокурова, Тойон-Арыы олохтооҕо: «Ыһыах буолар диэн бары оҥосто сылдьабыт. Киирии-тахсыы уустуктардаах дойду буоллахпыт».

Пелагея Иванова, Тойон-Арыы олохтооҕо: «Нэһилиэнньэ бары уонна Булгунньахтаах администрациятын кытта көҕүлээн күүс көмө буола сылдьабыт».

Ким кырааскалыыр, ким бөх хомуйар. Оттон күүстээх өттүлэрэ эргэ сценаны көтүрэллэр. Бу оннугар саҥалыы тииптээх сиэр-туом ыытыллар, кэнсиэрдиир сир оҥоһуллуо.

Тойон-Арыы баай историялаах, дириҥ төрүттээх нэһилиэк.  90 аҕа ууһа үөскээн-тэнийэн олорор Эркээни киэҥ киэлилитигэр  үйэлэри уҥуордаан, быйыл ытык сиргэ - Тойон Арыыга  Эллэй аан маҥнайгы Үрүҥ тунах ыһыаҕы ыспыт сиэрэ-туома хатыланыа. Маныаха саха төрүт үгэһин тэнитээччи Дабыл олохтоохторго сүбэ-ама буолар.   

Анатолий Павлов – Дабыл, саха итэҕэлин тарҕатааччы: «Быйыл Эллэй суолунан ыһыах ыһыытын бастакы холонуута буолар. Онно Эллэй Боотур кэлэн маннык ыһыах ыспыт буолуохтаах диэн».

Бу дьоҕус нэһилиэккэ тэрилтэ ирээтиттэн оскуола-саад, дьоҕус медпуун, хочуолунай, уот ыстаансыйата үлэлииллэр. Манна хороҕор муостаах, сыспай сиэллээх тэнийэр сирэ.

Айталина Васильева, "1-Малдьаҕар нэһилиэгэ" МТ баһылыга: «Манна дьон-сэргэ бэйэтэ төрүт өбүгэлэрбит үлэлэрин-хамнастарын тутан олороллор. Тыа хаһаайыстыбатын өрө туталлар. Хас биирдии дьиэ кэргэҥҥэ 10-100-кэ хороҕор муостаах баар. Киин ититии ситимэ киирбитэ 5 сыл номнуо буолла».

Бэс ыйын 25 күнүгэр Тойон-Арыылар ким баҕалааҕы барытын Эллэй ыһыаҕар алгыс ыла кэлэрин ыҥыраллар.