Муусука үрдүкү оскуолатын тутуу тэтимнээхтик барар

Саҥа муусука үрдүкү оскуолатын тутуута тэтимнээхтик бара турар. Манна билигин 30-тан тахса үлэһит тохтообокко үлэлиир. Бу сыл бүтүөр диэри тутуу бастакы түһүмэҕэ түмүктэниэхтээх. Дойду Президенэ Владимир Путин сорудаҕынан, саҥа оскуола 2026 сылга тутуллан киириэхтээх.

Иван Афанасьев,тутуу инженерэ: "Билигин бастакы этээскэ бетон үлэтэ барар. Матырыйаал, үлэһит тиийэр. Эбийиэк барытынан хааччыллан турар, онон үлэ тэтимнээхтик график быһыытынан барар".

Муусука үрдүкү оскуолатын 1993 сыллаахха Саха сирин бастакы Президенэ Михаил Николаев көҕүлээһининэн тэриллибитэ. Бу оскуола оҕо дьоҕурун өссө сайыннаран, талаанын арыйарга кыах биэрэр. Үөрэнээччилэр Россияҕа эрэ буолбакка, аан дойдуга тиийэ биллэллэр, элбэх ситиһилэнэллэр.

Надежда Зайкова, СӨ Муусука үрдүкү оскуолатын дириэктэрэ: "Биһиги кини  соругун толороммут, бу оскуола 11 сылын үлэлии турдаҕына, аан бастакытын скрипачтар ансаамбыллара баар буолар. Судаарыстыбаннай таһымнаах буолар. Устудьуон да буолбатахтар үөрэнээччилэр эрэ ол эрэн судаарсытбаннай таһымынаах буолаллар".

Саҥа муусука оскуолата 9,5 тыһ.кв.м. иэннээх, 3 мэндиэмэннээх 240 миэстэлээх  буолуоҕа, оҕо үөрэнэригэр-сайдарыгар туох баар усулуобуйа барыта тэриллиэҕэ. Манна улахан кэнсиэрдиир саала, бибилэтиэкэ, оҕолор үөрэнэллэригэр анал хостор баар буолуохтара.  Үөрэх куорпуһун таһынан 150 миэстэҕэ анаммыт интэринээт дьиэ итиэннэ оҕо оонньуур уонна спортивнай былаһаакката тутуллуоҕа.

Егор Гоголев, оскуола дьаһайар-хаһаайыстыбаннай чааһын проректара: "Биһиги өттүбүтүттэн туох баар кыахпытынан үлэлиэхпит. Муусукаҕа дьоҕурдаах оҕолорбут үөрэнэллэригэр үчүгэй дьиэ тутуллан тахсыа диэн этиэххэ наада".

Саҥа тутуу олус күүтүүлээх эбийиэк буолар. Бу оскуолаҕа үөрэниэн баҕалаах оҕо сылын аайы элбээн иһэр. Күн бүгүн оскуолаҕа 250-тан тахса үөрэнээччи муусука кэрэ эйгэтигэр уһуйуллар.

Надежда Зайкова, СӨ Муусука үрдүкү оскуолатын дириэктэрэ: "Номнуо “сиэннэрбит” кэлэн эрэллэр. Бу оскуоланы бүтэрбит оҕолор бэйэлэрин оҕолорун 1 кылааска биэрбиттэрэ хас да сыл буолла. Ол аата биһиги оскуолабытын сөбүлээн, анал идэлээх буолуохтара диэн аҕалаллар. Бу биһиэхэ үрдүк сыанабыл ".

Билигин муусука оскуолата норуоттар икки ардыларынааҕы "Симфония добра" диэн куонкуруһу ыытарга бэлэмнэнэр.  Бу күрэх бэс ыйын 23 күнүгэр саҕаланыаҕа. Манна Монголияттан, Кытайтан, Казахстаантан уонна да атын дойдуттан элбэх кыттааччы, ыалдьыт, кэлэрэ күүтүллэр.