Эдэр фермер Александр Корякин: Сүөһүнү аҥаардас харчы туһугар иитэр кыаллыбат

Киэһээҥҥи ыам. Күнү быһа арыы сир иҥэмтэлээх отугар мэччийэн ыанньыйбыт ынахтар биир биир киирэн үөрүйэхтик тураллар. Эдэр фермер Александр Корякин быйыл 33 ынаҕы ыыр. Төбөтүн ахсаанын элбэтэн, бу сайын түбүгэ элбэх. Кини 24 эрэ сааһыгар сүөһү иитиитэ курдук  уустук дьыаланы ылсыбыт.    

Александр Корякин, хаһаайыстыба салайааччыта: "Киһи бэйэтэ сөбүлээн дьарыктанар дьарыга эрэ буоллаҕына сүөһүнү иитиэххэ сөп. Аҥаардас харчы туһугар диэн Саха сиригэр кыаллыбат. Тоҕо диэтэххэ кыһыммыт уһуна бэрт, 9 ыйы быһа сүөһү хотон иһигэр турар. Үлэтэ ынырык ыарахан. Атын ханнык да регионнар биһиэхэ тэҥнэспэттэр. Үүппүтүгэр 65 солкуобай субсидия ылабыт, быйыл закупочнай сыаната 85 солкуобай".  

Хаһаайыстыбалаахтар саамай дохуот аахсар суолбут үүт туттарыыта диэн Александр үллэстэр. Онон кини ыанньык ахсаанын элбэтиигэ сыаллаан үлэлиир. 10 төбөттөн саҕалаабыт итиэннэ 5 сыл иһигэр быйыл 100 тириэрдибит. Эдэр киһиэхэ тутаах көмөлөһөөччүтэ ийэтэ уонна ыанньыксыта.  Тыа хаһаайыстыбата сайдарын туһугар дьиҥ ыалдьар дьон түмсүбүттэр. Онон үлэ таһаарыылаах, түмүгэ астык. Быйыл барыта 60 туонна үүтү туттарар былааннаахтар.

Евдокия Корякина, Александр Корякин ийэтэ: "Быйыл ынахпыт ахсаана элбээн үүппүт үчүгэй. Билигин үүт саамай өлгөм кэмигэр сарсыардааҥҥы ыамҥа 195-200 лиитэрэни ыыбыт. Киэһэ эмиэ оннук. Уопсайа күҥҥэ 400-чэкэ лиитэрэни туттарабыт".  

Ынах үүтэ тылыгар. Оттон Тойон-Арыы Өлүөнэ эбэ саамай улахан кээмэйдээх арыытыгар турар нэһилиэк. Онон манна ото ураты иэҥэмтэлээх. Билигин улахан куйаас түһэ илик буолан, үөн көйүүр аҕыйах, онон ынахтар дуоһуйа мэччийэн, ыанньыйан кэлэллэр.   

Юлия Львова, ыанньыксыт: "Сайын саҕаланыыта сөрүүн буолан ынахтар быйыл үүттээхтэр, үчүгэй. Үүт бөҕөтө буолан кэлэллэр, ыанныьйаллар".  

Аппараат үлэлиир буолан чаас иһигэр холкутук ыыллар. Сип-сибиэһэй ыаммытынан үүт бөдүөннэргэ кутуллар. Хаһаайыстыба салааччыта Александр сүөһүлэрин көрүүтүгэр уопутуран бэйэтэ туспа көрүүлэрдээх, албастардаах. 

"Эдэр фермер Александр Корякин ынахтара ураты сымнаҕастар. Бу сүрүн кистэлэҥэ – сахалыы матыыбы холбууллара. Маннык албас оннооҕор үүт кээмэйэ элбииригэр кытта дьайар диэн хаһаайыстыбалаахтар этэллэр".  

Тойон-Арыы сүөһү иитиитин төрүт дьарыгын тутан олорор. Бу дьоҕус нэһилиэккэ 6 улахан бааһынай хаһаайыстыба баар. Онон үрүҥ илгэ манна дэлэччи ыанар буолан тутар пуун киэһэ сарсыарда үлэлиир.