Дойду бастыҥ хирурдара икки киһи көрбөт буолаарыы гыммытын быһаатылар

Лениград уобалаһын кылаабынай офтальмолога Александр Головин 3Д ачыкынан микроскоп окулярын көрбөккө эрэ, харах кэлин өттүгэр миллимиэтир аҥаарыгар тиийбэт бэрт кыра хайаҕас оҥорор. Эппэрээссийэ хас биирдии түһүмэҕин хирург бэрт чопчу хамсаныынан аныгы оборуудабанньа көмөтүнэн ыытар. Сахарнай диабетттаах ыарыһахха уустук хирургическай эпэрээссийэ хайдах оҥоһулларын маастар-кылааска көрдөрөр.

Александр Головин, Ленинград уобалаһын кылаабынай офтальмолог бырааһа: "Бу оҥоһуллар эпрээссийэ киһи хараҕар улахан содула суохтук ыытыллар. Ол курдук миллимиэтир аҥаара эрэ хайа быһыы оҥоробут. Ити кыра дьөлөҕөстөр нөҥүө биирдэ эрэ туттуллар үнүстүрүмүөннэри киллэрэн эпэрээссийэ барар".

Уопсайа 2 хирург быраас уустук эпэрээссийэни табыгастаахтык оҥоруу уопутун үллэһиннэ. Иккис хирург Иркутскайтан сылдьар Владимир Зайка биир ыарыһахха дьүөрэлии икки эпэрээссийэни оҥордо. Олохтоох быраастарбыт үрдүк таһымнаах дойду офтальмологтарын хас биирдии хамсаныыларын болҕомтолоохтук кэтииллэр.

Екатерина Басова, СӨ харах балыыһатын офтальмолог-хирург бырааһа: "Биһиэхэ маастар-кылааска икки эпэрээссийэ буолла. Бу дьоннор сетчаткалара кэһиллиилээхтэр".

Харахха эпэрээссийэ ортотунан чаастан ордук бириэмэни ылар, ыарыһахтарга туһааннаах миэстэни эрэ утутуллар. Бу эпэрээссийэлэри онлайн форматынан конференцияҕа көрдөрөллөр, сиһилии кэпсииллэр. Киин куоракка Өрөспүүбүлүкэтээҕи офтальмология сулууспата төрүттэммитэ 100 сыллаах үбүлүөйүгэр анаммыт научнай-практическай конференцияҕа араас регионнартан барыта 200-чэкэ кэриҥэ харах бырааһа, сиэстэрэ кэллэ.

Алёна Аржакова, СӨ харах балыыһатын кылаабынай сиэстэрэтэ: "Маннык тэрээһин биһиги үлэһиттэрбит таһымнарын үрдэтэр. Тоҕо диэтэр уопут атастаһаллар. Ону таһына конференцияҕа үлэһиттэр саҥара, кэпсии үөрнэллэр".

Өрөспүүбүлүкэтээҕи  харах балыыһатыгар сыллата тыһыынчанан киһи сылдьар. Быраастар күннэтэ 100-чэкэ ыарыһаҕы көрөллөр. Саамай тэнийбит ыарыыларынан сахарнай диабет харахха оҥорор содула, глаукома, онтон да атын патологиялар буоалллар. Маныаха ыарыыны сэрэтиигэ, эмтэнии хайысхатын кэҥэтиигэ улахан болҕомтону уураллар.

Светлана Аргунова, СӨ харах балыыһатын офтальмолог-хирург бырааһа: "Биһиэхэ кэлин сылларга араас үрдүк таһымнаах аппаратура кэллэ. Онон туһанан араас уустук эпэрээссийэлэри оҥоробут. Холобур, лазер көмөтүнэн катарактаны оҥоробут уонна мөлтөхтүк көрөр дьону эпэрээссийэлиибит".

Саха сирин харах балыыһата дойду үрдүнэн бастыҥ үлэлээхтэр истэригэр киирсэр. Сыллата хааччыллыы, идэ таһымын үрдэтии көрдөрүүтэ тупсар.