Быйыл киин куоракка 12 суол тупсарыллар, уопсайа 15 км усталаах суолу оннуттан оҥороллор

Сэргэлээх шоссета. Гимеин эргиир суолуттан Птицефабрика оройуонугар киириигэ диэри уопсайа 3 км усталаах суол капитальнай өрөмүөнэ ыам ыйыттан саҕаланан бара турар. Билигин 20 киһилээх биригээдэ суол кытыытын - сатыы сылдьар дьон сирин оҥорор түбүгэр сылдьар. Бэдэрээччитинэн "Дороги Саха" тэрилтэ буолар. Манна сотору кэминэн эргэ аспаалын сорох сиринэн көтүрэн саҥаны ууруохтара.     

Алексей Афанасьев, суол маастара: “Билигин тротуар о4оруута бара турар. Антах кумах кутуута барар. Сотору аспаал көтүрүүтүгэр киириэхпит. Аспаалбыт түһүмэхтээн ууруллар буолла”.  

Бу суол өрөмүөнүгэр уопсайа 400-чэкэ кэриҥэ мөлүйүөн үп тыырыллыбыт. Манна айан-сырыы хааччахтамматын туһуттан суолу бүтүүннүү саппакка үлэлэри түһүмэхтэринэн ыыталлар. Айсен Кардашевскай улахан тиэхиньикэ машиниһынан үлэлээбитэ 10-тан тахса сыл буолла. Билигин Айсен Назарович экскаватор үлэтин сүрүннүүр. Бу абыраллаах тиэхиньикэ суол ыарахан үлэтигэр солбуллубат көмөлөһөөччү.

Айсен Кардашевскай, экскаватор машиниһа: "Үлэтэ элбэх. Кумах тиэйэн, сүөккээн. Бордюрдары көһөрдүүбүн, сүрүн үлэм ол".

Быйыл куорат үрдүнэн 12 суолу өрөмүөннүөхтэрэ, уопсайа 15 аҥаар килэмиэтир саҥардыллыаҕа. Өссө биир бөдөҥ өрөмүөн үлэтэ Хабаров аатынан уулуссаҕа ыытылла турар. Манна Ярославкай уулуссатыттан Богатырев уулуссатыгар диэри кэрчик суол өрөмүөннэр. Хабаров уулуссатын өрөмүөнүн "РИК Автодор" тэрилтэ сүрүннүүр.

Александр Алексеев, өрөмүөннэнэр учаастак салайааччыта: "Суобут уһуна 1,5 килэмиэтир, кэтитэ 14 миэтэрэ, суол 4 балаһалаах. Билигин учаастакка 10 тиэхиньикэ үлэлии сылдьар".

Суол үлэтин сэргэ гаас турбатын эмиэ уларыталлар. Бу эргин олорор дьиэ ахсаана биллэ элбээн, гааска наадыйыы көрдөрүүтэ үрдүүр. Онон эргэ гаас турбатын саҥа улахан кыамталаах, диаметрдаах турбаҕа саҥардаллар. 

Гаврил Дормидонов, гаас турбатын уурар тэрилтэ учаастагын салайааччы: "Суон турбаны угабыт, онон элбэх гааһы ыытарын ситиһэбит. Гаас барыларынгар тиийэрин хааччыйар сыалтан үлэ барар".

Бу Хабаров уулуссатыгар баараҕай өрөмүөн үлэтэ түһүмэхтэринэн 2027 сылга диэри тардыллыаҕа. Быйыл Чиряев аатынан уулуссаҕа диэри учаастагы бүтэрэр соруктаахтар.