Тоҥоруу түһэрэ күүтүллэр

Хаһаайка бүөбэйдээн улаатыннарбыт дьэдьэннэрэ хаһыҥҥа бүрүллэн туралларын көрөн хараастар каадырдарын көрөбүт. Бу курдук устуулар бу күннэргэ социальнай ситими тилийэ көттүлэр. Үгүс улууска тоҥоруу түһэн оҕуруоччуттарга хоромньуну таһаарда. Халлаан маннык күүскэ тымныйыыта бэс ыйын ортотугар сэдэх көстүү.

Тоҥоруу Сунтаар, Ленскэй, Горнай, Хаҥалас, Амма улуустарыгар түстэ. Бу оройуоннарга  түүҥҥү температура ортотунан -3 буола сыратта. Сунтаарга  -5 диэри түстэ. Оттон Дьааҥы уонна Кэбээйи хайаларыгар олох да  инчэҕэй хаар түһэр. Эбээн Бытантайдар сайыҥҥы куйаас күҥҥэ сылыамныах оннугар хаар киһи оҥорбуттара куйаар ситиминэн тарҕанар.  Күнү-дьылы кэтээн көрөөччүлэр этэллэринэн тымныы Арктика салгына кэлэн турар. Итиэннэ бу күннэргэ бэринэр санаата суох.

Саргылаана Никитина, Дьокуускайдааҕы күнү-дьылы кэтээн көрөр  сулууспа күн-дьыл туругун сылыктыыр салаатын салайааччыта: "Бэс ыйын 17-18 күннэригэр тоҥоруу түһүө. Бу киин, Бүлүү бөлөх, Алдан, Ленскэй оройуоннарыгар".

Бэс ыйа ыһыыга саамай суолталаах ый. Олордуу түмүктэнэн, үүнээйи күүһүн ылар кэмэ. Манна күн-дьыл туруга быһаччы тутулуктаах. Быйыл Саха сиригэр 58 тыһыынча гектар иэннээх сиргэ ыһыы ыытылынна. Бу ааспыт сылтан 4 тыһыынча гектарынан элбэх. Оттон билигин хаһаайыстыбалаахтар көлөһүннэрин тымныы күн-дьыл имили сотор кутталлаах. Онон туһааннаах министиэристибэ үүнээйини хаһыҥтан быыһыыр сыалтан кэккэ дьаһаллары ылла.

Сахаяна Павлова, СӨ тыа хаһаайыстыбатын уонна ас-үөл политикатын миниистирин солбуйааччы: "Күнү-дьылы кэтээн көрөр сулууспаттан сэрэтии сурук туттубут. Бу маннык кэнники сылларга буола илигэ. Сурукка ыйылларынан салгын температурата -4 кыраадыска диэри тымныйыа. Онон оҕруотунан дьарыктанар  бары хаһаайыстыбаларга сэрэтии ыыттыбыт". 

Күнү дьылы кэтээн көрөөччүлэр этэллэринэн маннык тымныы бэс ыйа кэнники сылларга бэлиэтэммэтэх. Бу кэмҥэ үгүстүк Горнай улууһугар хаһыҥныыр буоллаҕына быйыл соҕуруу кытта күүскэ тымныйан соһутта.

“Билигин өрөспүүбүлүкэ бүттүүнүгэр тымныы күн-дьыл турар. Оннооҕор соҕуруу улуустарга тоҥоруу буолла. Орто температура нуорматтан быдан намыһах. Холобур, Дьокуускайга күнүскү температура уонатн тахсанан кыра”, - Мария Дмитриева, корреспондент.

Нэдиэлэ ортотуттан халлаан улам сылыйан барыаҕа диэн күнү-дьылы кэтээн көрөөччүлэр иһитиннэрэллэр. Онон сайыҥҥы куйаас сотору төннүө.