Ууга хонтуруол күүһүрэр

Иниспиэктэрдэр тутатына нүөмэрэ суох гидроскутерынан айаннааччыны тохтотон бэрэбиэркэлииллэр. Эр киһи уу аалын саҥа ылыммыт, онон учуокка туруорбакка сылдьар эбит. Оттон учуокка туруорбакка айанныыр көҥүллэммэтин суоппар билбэт эбит, ону иниспиэктэрдэр тоһоҕолоон эттилэр. Итиэннэ бастакы кэһии буолан сэрэтии биэрдилэр.

Кэнники сылларга дьоҕус суудуналар испииһэктэрэ кэҥиир. Билигин манна оҥочолор, катердар эрэ буолбакка икки миэстэлээх  гидроскутердар эмиэ киирэллэр. Бэлиэтээн эттэххэ, бу көлөнү ыытарга эмиэ туһааннаах докумуон ирдэнэр, техосмотр эмиэ барытын ааһыахтаахтар.

Дьулустаан Фёдоров, СӨ ЫБММ алын суудуналарга судаарыстыбаннай иниспиэксийэ Аллараа Бэстээхтээҕи кэтээн көрөр сулууспатын салайааччы: "Суудунаны ыытааччыларга оҥочолоргутун сайыҥҥыга бэлэмнииргитигэр, үлэлиир туругун көрүнэргитин, докумуоннаргытын барытын баар гынаргытын сүбэлиибит. Техническэй туругу, регистрацияны Госуслуги портал нөҥүө толороҕут. Маны сэргэ уу барпыыбылатын кэспэккитигэр ыҥырабын". 

Оттон күн устата дьоҕус суудуналарга иниспиэксийэ уонча уу аалын суоппардарын бэрэбиэркэлээтэ. Сүрүннээн ыытар быраабы туоһулуур докумуоннарын, итиэннэ хайаан да харыстыыр сэлиэччик баарын көрөллөр. Уопуттаах суудунаны ыытааччылар номнуо докумуоннарын ууммутунан бэйэлэрэ чугаһыыллар. Ол эрэн кэһээччилэр да син биир көстөллөр.

Андрей Иванов, ЫБММ Саха сиринээҕи салалтатын дьоҕус суудуналарга судаарыстыбаннай иниспиэксийэ Дьокуускайдааҕы салаатын иниспиэктэрэ: “Быйыл уунан сырыы арыллыбыт кэннэ Дьокуускай чугаһыгар 13 буруйу кэһиини бэлиэтээтибит. Бу сүрүннээн бырааба суох салайыы, суудунаны учуокка туруорбакка эрэ ыытыы буолар”.

Оттон билигин  арыыларга күөх луугу хомуйуу үгэнэ, маны тэҥэ балыктыы-сынньана барааччы эмиэ үгүс. Аны туран сөтүө кэмэ саҕаланна.

"Иниспиэктэрдэр күннэтэ уу эбийиэктэригэр хонтуруол үлэтин ыыталлар. Манна дьоҕус суудуналары эрэ буолбакка сөтүөлүүр дьону эмиэ көрөллөр-истэллэр. Итиэннэ көрүүтэ-истиитэ суох сылдьар оҕолору кытта сокуоннай саастарын ситэ илик оҕолор  иниспиэктэрин кытта кэтииллэр", - Ирена Осипова, корреспондент.