Тыа сирин мэдиссиинэ тэрилтэлэригэр саҥа массыыналар күлүүстэрин туттардылар

Саҥа массыыналары аан бастакынан суоппардар сыаналаатылар. Тутан-хабан, ис өттүн сыныйан үрдүк сыанабылы биэрдилэр. Саҥа көлөлөр бары ирдэбилгэ эппиэттииллэр, биһиги региоммут климатыгар ананан оҥоһулубуттар.

Анатолий Осипов, Хаҥалас улууһун балыыһатын суоппара: «Кэтэһэн үөрүү-көтүү бөҕө. Отой үчүгэй, биһиэхэ маннык эрэ массыына сылдьар буоллаҕа».

Тыа сирин суолугар саамай наадалаах көлө УАЗ массыына. Бу күн Ил Дархан 17 массыынаны 13 улууска туттарда.  Национальнай бырайыак чэрчитинэн быйыл өссө  45 саҥа массыына кэлэрэ күүтүллэр.

Амма улууһа бу үөрүүлээх күн икки саҥа массыына күлүүһүн тутта. Саҥа массыыналарынан хааччыллыы улуустар киин балыыһаларын үлэлэригэр иккис тыыны биэрэр.

Михаил Архипов, Амма улууһун балыыһатын кылаабынай бырааһа: «Бүтэһик сылларга нэһилиэнньэ бэлиэтииринэн, массыыналар сүрдээх туһалаахтар, табыгастаахтар. Саамай үөрэрбит диэн 2023 сыллаахха флюра уонна маммологическай аппарааттаах автобус биэрбиттэрэ. Кытыы сытар нэһилиэктэргэ осмотр оҥоробут».

Бүлүү улууһа эмиэ икки саҥа массыына күлүүһүн тутта. Варвара Дмитриевна доруобуйа эйгэтигэр үлэлээбитэ 50-чэ сыл буолла. Мантан ыла ыраах сытар нэһилиэктэргэ, суһаллык көмөҕө наадыйар дьоҥҥо түргэнник тиийэр буолуохпут диэн үөрүүтүн үллэстэр. 

Варвара Ксенофонтова, СӨ үтүөлээх бырааһа: «Массыына олус наадалаах. Тыаны барытын кэрийэбит. Сарсыардаттан киэһээҥҥэ дылы массыына вызовтарга сылдьар, анаалыс илдьэр, ЭКГ усталлар».

Кэнники биэс сылга Саха сирэ доруобуйа харыстабылыгар уопсайа барыта 376 массыынаны ылла. Бу доруобуйа харыстабылын салаата сайдыытгар төһүү күүс.