Нам улууһугар бэс питомнига сайыҥҥы үлэтин саҕалаата

Анал тэрил көмөтүнэн кырачаан бэрдьигэстэр ойуурга миэстэлэрин булаллар. Тыа хаһаайыстыбатын техникумун устудьуона Ариан Готовцев мөһөөччүккэ укта сылдьар сүүһүнэн бэрдьигэстэри биир-биир ылан олордор. Кини номнуо иккис сылын бу идэтинэн практиканы Эҥсиэли хочотун баай тыатын чөлүгэр түһэриигэ ааһар. Эр киһи хайаан да мас олордуохтаах этиини хас эмит тыһыынчанан бырыһыан толордум диэн күлэр.

Ариан Готовцев, Дьокуускайдааҕы тыа хаһаайыстыба техникумун 2 кууруһун устудьуона: «Күҥҥэ биир Урал кэлэр, дьааһык. 3 күн олордобут. Сарсыарда аҕыстан үлэлиибит. Туһалаах, баһаар буолбут сиригэр саҥа мас олордор үчүгэй буоллаҕа».

Мас олордуутнан дьарыктанар тэрилтэ билигин бу Нам улууһугар Таастаах нэһилиэгин аттыгар үлэлиир. Манна 240 тахса гааҕа бэрдьигэстэри олордоллор. Саас-сайын сыллата бу Дьокуускайдааҕы тыа хаһаайыстыбатын устудьуоннара практика быһыытынан кэлэн көмөлөһөллөр итиэннэ хамнас аахсаллар. Оттон тэрилтэ төгүрүк сыл манна үлэлиир. Анаан-минээн баһаар буолан ааспыт сирдэрин чөлүгэр түһэрэллэр. 

Константин Горохов, үлэһит: «Кыһын бу сири ыраастыыбыт, сайын олордобут. Быйыл уопсайа болуоссаппыт 240 га. 40 тыһ. бэрдьигэс олордобут. Бастаан тыраахтыр ыраастыыр, онтон сири хорутар, ол кэннэ олордон киирэн барабыт».

Мас олордор учаастак улахан итиэннэ суол-иис суох буолан үлэһиттэр вездеходунан сылдьаллар. Онон бэрдьигэстэр уһун киэҥ айаны ааһаллар. Оттон бу кырачаан мастар бэйэ питомнигар үүннэриллибиттэр. Муус устар ыйга ыһыллыбыт сиэмэлэр билигин номнуо хара тыаны саҥа тыынныыллар. Оттон теплииссэҕэ номнуо иккис ыһыы саҕаламмыт.

Александр Охлопков, агроном: «Иккис эргиир ыам ыйа бүтэһигэр олордуллубута. Аахтахха 15 тыһ. буолар. Илиибитинэн олордубут».

Онон тэрилтэ тыаны чөлүгэр түһэрии үлэтин сиэмэттэн саҕалаан ыытар. Номнуо 4 сылларын дьарыктаналлар. Бу кэм тухары балтараа мөлүйүөнтэн тахса бэрдьигэһи олортулар. Сүрүннээн баһаарга былдьаммыт учаастактарга үлэлииллэр. Онон айылҕаны чөлүгэр түһэриигэ бэйэ кылааттарын киллэрэллэр.