Саха сиригэр "Төрөппүттэргин түмэлгэ аҕал" диэн Арассыйатааҕы акция саҕаланна

Уус Алдан улууһуттан сылдьар Аэлита Гоголева түмэлгэ, тыйаатырга куруук сылдьар. Аахсыйа саҕаламмытын истэн, бу сырыыга дьиэ кэргэнин кытта сөбүлүүр түмэлигэр кэлбит.

Аэлита Гоголева, М.К. Аммосов аатынан ХИФУ устудьуона: «Оҕолор, балтыларым наһаа интириэһиргээтилэр. Сайын култуурнайдык сынньанар курдук, элбэҕи саҥаны билэр курдук түмэлгэ кэллибит. Маастар-кылаастар игин ааһаллар, ийэбин кытары кэлэ сылдьыбыппыт».

Бу аахсыйа бүтүн Дойду үрдүнэн ыытылла турар. Хас биирди пушкинскай каарталаах оҕо төрөппүтүн кытта сөбүлээбит быыстапкатыгар, култуура эйгэтигэр ыытылла турар тэрээһиннэргэ сылдьар кыахтанар.

Алевтина Николаева, СӨ муусука уонна фольклор түмэлин үлэһитэ: «Каарталаах оҕо төрөппүтүн илдьэ кэлэн бириэмэлэрин туһалаахтык атаарар кэмнэрэ. Түмэлбитигэр кэлэн Сахабыт сирин фольклоруттан саҕалаан, муусука үнүстүрүмүөннэрэ, араас норуоттарбыт сиэрдэрин-туомнарын билиһиннэриэххитин сөп».

Хас биирдии кэлбит ыалдьыт экспонаттары көрөрүн таһынан, тутан-хабан, музыкальнай инструменнарга оонньуон сөп.

Түмэлгэ историяны кэпсиир экспонаттар баалларын таһынан, киинэлэри, оҕолорго ойуулуктары, олохтоох омуктар ырыаларын-тойуктарын сөргүтэн, үйэтитэн кинигэлэри таһаараллар. Онон олус интэриэһинэй, баай экспонаттаах түмэл диэн Слепцовтар дьиэ кэргэн сыаналыыр.

Елена Слепцова, Дьокуускай куорат олохтооҕо: «Кыыһым ардах ыҥырар үнүстүрүмүөнү сөбүлээтэ. Бу мусуойга маастар-кылаастарга сылдьабыт. Мин оҕуруонан быысыпкаҕа сылдьыбытым. Дьиэ кэргэнинэн сылдьарбытын сөбүлүүбүт».

Бу анал аахсыйа бэс ыйын ортотугар диэри ыытыллыаҕа. Онон олохтоохтору бириэмэҕитин туһалаахтык,  киэни-элбэҕи көрөн-билэн атаараргытыгар ыҥыраллар.